Popular Bible Verses from KOLOHI 2

Share

Nyimi angu dedi mbàda kataku-minyaka i Karitu Yehu ba Miriya. Jia-duya nu màtawa kai luri pa-mbulungu dàngu Nyuna, dàngu kai paamu lai Nyuna. Màtawa nyimi kai pahada-nya na lurimi ba jiaya i Karitu na latana. Màtawa nyimi kai parukangu papawai lai Karitu, tundunya na pambàda ajaru-kai. Dàngu màtawa da etimi ka da-mbumbaru wàngu lii pa-malangungu.

Màtawa nyimi kai pananjarungu, napa hi ningu lia mahiru-ha da etimi ba dawàngu mà - màtu pa-manggàna wàngu la pinu tana na manda palingu, tàka ma-panjàrangu-ha. Da manggàna nuda nda ma-pawelingu lai Karitu-ha, tàka manggàna pahunggu tau-aha dàngu da wàndi da ma-kuaha-ya na pinu tana.

Àmangu, nyimi mbàda meti-mika la huri pangahu rukuna bai njala, dàngu ba nda pakàri-kai la tolu. Tàka nàhu nyimi na-paluri pakaria-nggaika dàngu i Karitu paraïna i Ala. I Ala mbàda jàma hàla-nanjaka da njalanda, nda na-ihili-anyapa na huratu wutangu-nda, na ma-pangàdu wànda kalaratu - kalaratu mambotu. Ba na-harika-nyaka nuna na huratu la ai harikangu, na-podahu-ha i Ala mbuu ndàbada da pakàla wànanda.

Nadu mbuu ndàbana na hada wikina i Ala ni hàla-manya lai Karitu, nu la hada tauna. Dàngu ba ruku luri pa-mbulungu dàngu i Karitu, nyimi pa-wuangu-mbukai luri malundungu. Nadu i Karitu jia-mayaka na mangia dita hàlanja nimbihu da wàndi da ma-kuaha dàngu da ma-pareta.

Jia-duya nu àmbi pahia-dunya na tau la pa-panjala-kai nyimi la ngera pangangu pa-ngunungu, jàka ndia la ngera lodu - lodu bokulu anggama, jàka ndia la pa-mbabungu wula bidi, jàka ndia la ngera lodu Hangahu. Nuda mbuu ndàbada beri maü-adaha duda da manàmu-nja, tàka na mawuwa na ngerada nuda jia-mayaka i Karitu!