Popular Bible Verses from O IBRANI 12

Share

Aa, yakorona ngone mahirete, inäkilolitino ngone naga duru kamangangöe o hakihi! Hababu gënanga, niaino ngone haumo mata-mata inahitotubuho ngone deʼ o baradoha kahoko genangika imahi totataulu ngoneoka. Deʼ niaino ngone hakaigoungu hanïki o rorebe naga tongone nanga himangoka. Kokiani tongone nanga lolega madumutu o Yesusika, hababu Unanga dika wamomomiki tongone nanga ngongaku deʼ wapaliara madodihirakahi hiädono mabobaha. O Yesus wotongohono watagongo o huha de o hangihara o salib magotaka! Unanga wohaduliua wohonenge o salib magotaka gënanga ganga o hali moi iwihi mal̄eke. Unanga duga-duga wohininga mangale o mörene kiaka Unanga aha wamäo maduruino. Orahananga Unanga wogogeruku o kuruhi imomulia ma Jou Madutu ainirakoka deʼ wopareta dede Unanga.

Itiai maöraha ngone inädotoko, o hukumanga gënanga nanga hininga yasanangiua, duga-duga kayahuha dika. Mä duruino de gënanga, ngone inädoto-dotokoka, o hukumanga gënanga idadi o hababu ngone howango imöteke ma Jou Madutu aimau, deʼ mahasili o lolä mamamäo ngoneino.

Nohidailako la nowango nimahitekehi dodiai de o nyawa mata-mata. Nohidailakoli la nowango itebini, maboboloi mangale ma Jou. Hababu kamoiö de iwimäkeua ma Jou nako ünanga wowangoua hokä hokogënanga.

Abeika niapikiri sarakia o Yesus aihangihara wähimanga o nyawa yoböbaradoha iwilawani hokogënanga mamogiria! Hababu gënanga uhali niahininga iëteke deʼ nianganono itöaka.

Hababu gënanga, kokiani ngone hotemo tarima kasi ma Jou Madutuika, karana ngone hatarima Unangino o koano mapopareta moi iyaku-akunua igiwi. Kokiani ngone hotarima kasi deʼ hopuji-puji ma Jou Madutuika de mahoromati deʼ mamodongo, imoteke madodagi Una mahirete wöigo-igo.

Kokiani ngini niatarima o gogohara ma Jou Madutuino hokä o dodötoko moi o amaino. Hababu boteka o ngohaka womatëngo aiama kowïhukumua?

Hababu tongone nanga Jou Madutu hokä o uku ihitö tuhu-tuhuku hiädono yöuku.

Tongone nanga dimono o duniaka inädotoko ngone duga-duga maöraha madodipoko, imöteke okia önanga yamäo yaoa. Mä ma Jou Madutu wonädotoko ngone mangale tongone nanga oa mahirete, hupaya ngone yakunu idadi hotebini homa kokomöteke dede Unanga.

Hababu niaparangi magoronaka nialawani o baradoha, ngini komaiwahi niparangi hiädono nia awunu ikopoa.