Popular Bible Verses from ROMA 14

Share

Séngaq Kerajaan Allah ndéqne soal napi saq bau tekelorang dait teinem, laguq mengenai keadaan tejariang kenaq léq arepan Allah, damé sejahtere dait sukecite léq dalem Roh Suci. Dengan saq ngelayanin Almasih maraq nike, nyenengang Allah dait tehargein siq dengan lain.

Lamun ite idup, ite idup bagi Tuhan. Dait lamun ite maté, ite éndah maté bagi Tuhan. Jari, idup atao maté, ite dowén Tuhan.

Keranaq nike silaq ite gawéq napi saq datengang damé sejahtere dait saling neguqang iman.

Keranaq nike ite ndaq saling hakimin. Sebalikne turut hukum niki: Ndaq jangke miaq semeton side pade jari tegode dait bedose.

Séngaq araq tetulis léq Kitab Suci, maraq niki manik Tuhan, “Demi idup Tiang, sebilang dengan gen sujut léq arepan Tiang, dait sebilang dengan gen ngaku bahwe Tiang Allah.” Jari, ite sopoq-sopoq harus betanggung jawab léq selapuq perbuatante tipaq Allah.

Terimaq dengan saq lemah imanne, ndaq hakimin pendapetne.

Sai side pade setetune sehingge side pade bani ngadilin pelayan dengan lain? Timaq pelayan nike rebaq atao nganjeng, nike urusan majikanne. Dait mule pelayan nike pasti gen nganjeng malik séngaq Allah sanggup piaq ie nganjeng.