Popular Bible Verses from EPESUS 4

Share

Sebalikne, side pade harus gerasaq dait murah até sopoq kance saq lain, dait saling ngampunin pade maraq Allah ngampunin side pade langan Almasih.

Side pade harus tetep rendah até, lemah lembut, dait sabar. Petitoqang kasihde siq care saling tulung sopoq kance saq lain.

Lamun side pade ngeraos, ndaq kadu ucapan-ucapan saq kotor. Kadu ucapan-ucapan saq solah saq bau ngajah dait nulung dengan lain. Ucapan-ucapan saq maraq nike gen datengang rahmat tipaq dengan-dengan saq dengah.

Tetéh selapuq rase sakit até, dendem, sili, betungkasan dait nyumpaq-nyumpaq. Ndaq malik araq rase meriq atao perasaan lain saq maraq nike.

Lamun side pade sili, ndaq alurang hal nike jari penyebap side pade bedose. Ndaq sili sejeloan, adéq Belis ndéq mauq kesempatan.

Keranaq nike tetéh selapuq tabiat manusiende saq laéq, saq kenyeke nyédaq siq keméléq-keméléq saq nyesatang. Roh dait pikirande harus tejariang baru selapuqne. Side pade harus idup jari manusie baru saq tecipteang menurut pekayunan Allah léq dalem kebenaran dait kesucian saq setetune.

Dait pade berusahe meliharaq kesatuan Roh siq care kadu damé sejahtere jari pengiketne

Ie saq ngicanin rasul-rasul dait nabi-nabi, dengan-dengan saq nyampéang Kabar Solah dait pemimpin-pemimpin jemaah dait guru-guru jemaah. Hal nike Ie laksaneang jari ngelengkapin dengan-dengan saq tehususang bagi Allah jari pegawéan pelayanan, jari pembangunan rage Almasih. Siq care nike ite selapuq jari sopoq siq iman saq pade dait pengertian saq pade mengenai Bije saq asalne léman Allah. Dait ite jari dengan-dengan saq déwase, saq sayan ngonéq jari sayan sempurne maraq Almasih.

Make ite ndéq jari kanak-kanak malik saq ndéq tetep pendirian dait tejauq ketoq-ketéq siq macem-macem pengajahan lantaran tipu muslihat manusie dait léq dalem kelicikan ie pade saq nyesatang. Sebalikne, ite harus nyatayang kebenaran siq até saq penoq kasih, sehingge dalem selapuq hal ite sayan ngonéq jari sayan sempurne maraq Almasih saq jari kepalente.