Popular Bible Verses from 2 PETRUS 1

Share

Allah bi makei kuaso ilahi-Ne utuk melei ngen ite kute de ite perlu utuk idup beribadah. Si menea yo liwet jano de ite namen tetang Yesus Kristus, de sudo menok ite utuk menikmati kebesaran ngen kebaikan-Ne. Ngen ca'o do'oba Allah melei anugerah ngen ite berkat-berkat de kembiak luea biaso ngen bego de sudo jenanjai-Ne. Ngen berkat-berkat o udi dapet mbebas udi kunei kelok-kelok kidek de musak neak dunio yo, ngen udi temimo sifet ilahi.

Kerno o, berusahoba sungguak-sungguak supayo udi tep pecayo ngen Kristus, ngen pecayonu o tenunjang idup de baik. Seluyen idup de baik udi perlu jijai tun de temuan pengetahuan, seluyen pengetahuan, udi harus kulo dapet kemuaso dirai. Ngen seluyen dapet kemuaso dirai lokba udi kulo mupuk dirai utuk tabah madep kute sesuaktau. Ngen seluyen tabah madep kute sesuaktau, udi harus kulo idup temurut kelok Allah. Ngen idup temurut kelok Allah harus kulo nelkep ngen kasih sayang ngen saudaro-saudaro do imen. Selanjutne lokba kasih sayangnu ngen saudaro-saudaro do imen tenambeak ngen kasih teadep kute tun.

Kutene o adeba sifet-sifet de udi perlu. Amen sifet-sifet o ade padonu ngen berlimpah-limpah, udi bakea jijai giat ngen berasea, ngen kemnal Yesus Kristus Tuhan ite ngen lebiak baik igai.

Sebab o, Saudaro-saudaro, beusahoba lebiak giat supayo panggilan Allah ngen Piliak-Ne das dirainu o jijai semakin teguak. Amen udi menea o, udi coa bakea murtad.