Popular Bible Verses from EPESUS 4

Share

Sobalikoh, pios ihkam hinut ahtoi tutang tuwi sita-asi 'cobehti toharep ijo bohkon, tutang saling ngapun kolou Pohotala jari ngapun ihkam nguha Kristus.

Hondakrih ihkam turus randah ahtoi, bolomu-lembai, tutang sabar. Ngorinahohrih asin'kam, honong hokodohop ihco umba ijo bohkon.

Amat ihkam pander ara hapa tuhtui-tuhtui ijo ja'at. Hapa iourih tuhtui-tuhtui ijo majar tutang nonga pondohop ahkan ulun bohkon. Tuhtui-tuhtui kolourih ahkan mompolombut komorong ahkan ulun-ulun ijo ngonihoh.

Dianohrih karon anyam koporos ahtoi, dondam tutang kosingi. A'ai hino bokociak-ciak tutang mongajea-jea. Ara hino anai anyam hiri ata'ai anyam bohkon ijo sama mahcam orih.

Amat ihkam sangit, ararih mohonou kosangit rih, kotuluioh ihkam bodusa. A'airih bosingi sohopus ondou, mangat sehtan a'ai dahpot kosapetoh.

Kotului orih molokakohrih ko-ulun hounumba pola pombolum lomoi, ijo rahat tonorusak bain kojolik-kojolikoh ijo monyosat. Kohondakrih ahtoi tutang tiruk'kam tobahua koparingoh. Kohondakrih ihkam bolum kolou kolunon bohua ijo tona'oi numbun pola Pohotala; iorih umba tobiat ijo morong, bujur tutang borasih.

Bousaha tu'u-tu'u ahkan bolum honong kobuah, mangat kohihco ijo tona'oi bain Roh Pohotala tohtap tonojaga.

Iorih ijo ‘‘nonga pononga-pononga ahkan kolunon’’; 'cokobarih tonuot-Oh monjadi rasul, ijo bohkon monjadi nabi, ijo bohkon hino monjadi pomborihta Kabar Hinut rih, tutang ijo bohkon hino tonuot-Oh monjadi guru-guru tutang pohaga ukup. Tuh tononguai-Oh mangat ukup Pohotala tonyukup paringoh mangat dahpot mohalu Tuhan, tutang mangun bereng Kristus. Honong kodorih ihto paringoh monjadi ihco, bain koporocaya ijo sama, tutang kohorahti ijo sama tohou Anak Pohotala. Tutang ihto monjadi ulun-ulun ijo dewasa, ijo mahi tahi mahi botambah kosoporuna kolou Kristus.

Mahka ihto eam monjadi anak-inyam hino ijo kuhtang-kitui tutang hanyu-hanyut konomin ko-anan-ko-ohtoi bain rohusan mahca-mahcam ajar tahkan ulun-ulun ijo lihcik. Iro nyosat ulun umba tihpu muslihat iro. Eam! Sobalikoh ihto harus ngorinah hal-hal ijo morong, umba ahtoi ijo tuwi pongasih, nyiring a'ang kokaro hal ihto mahi tahi mahi monjadi soporuna, kolou Kristus, ijo monjadi kopala ihto.