Amos te ije biti sakatik tabiri bara lewu Tekoa. Ie manjadi nabi katika lewu Yuda irentah awi raja Usia, tuntang Israel irentah awi Raja Yerobeam, anak hatue ain Yoahas. Due nyelo helo bara gerek petak manjadi, Hatalla mamparahan akan Amos kare taloh tahiu Israel.
Jetoh ie taloh je insanan Amos,
“TUHAN manyakungkong sama kilau auh singa bara bukit Sion,
auh Ayue mangguroh bara Yerusalem.
Kare padang oru keang,
oru hong Bukit Karmel keang karitip.”