Popular Bible Verses from OROMA 4

Share

Mbal Pem Nagawan-nen urul paga yak tidnak na-ge ar-e indi mberen yigit lak, indi angin tubu yidnak wat tak irit worasolar-e, at indi angin tubu yidnak pem amawi rak obosola-ge, Mbal Pem Nagawan erembel wanosolat woragaij-o. ”Mbal Pem Nagawan-nen urul paga yak niridnak iri-ge at amawi kwarat me, kwar-et ma-o” luk at indi mondok wat tak irit woragaij-o.

Mbal Pem Nagawan-nen Abaram yak tosolar-e: ”Kar-e ap enlem kwarat onmbo rak kibigi-o” luk yak tij-o. Nde, urul yak tid iri-ge Mbal Pem Nagawan na imbiri bem-e ob-et worasu-o. Nde, at ebem indi angin tubu yid Mbal Pem Nagawan iri-nen-e wat yidnak nab-e unluk tak posolat, at ene nak-nen lak woraidnak mende-t nde, worak tak posolat yoso-o.

Yesus na-ge nit meya yidnak pem wat makluk, weserak uburuk, nit lud tak nak nunpuwakluk uruk tak pij-o.

”Kar-e ap enlem kwarat onmbo yugun-o” luk yak tidnak wene bem-e at indi mbung mbung tak worasoma-ge, mondok meya yij-et nde, at indi angin tubu luk, wene na bem indi mbung mbung tak woraidnak me, kwat yid irir-o. At yak tidnak wene-nen yosolar-e: ”Kat-nen ndakun lolo-ge inik nggal wigak ma-o” luk yak tidnag-e ndak ndak agaij-o.

Nde, urul pidnak wene iri-ge Mbal Pem Nagawan ebem indi angin tubu yidnak pem-net yak tij-o. Iri yak tid iri-ge, urul pidnak wene iri-ge we wok ondoso elem pem Abaram-nen ndagaidnak lolo pidsa-nen winde yuwakluk-nen yak tij-o. Imiri mbarak pidnak wene-nen yidnak yidnak nak kwarugwi nap enmanggim nag-e lag-o. Are, Abaram indi angin tubu yid nggal, iri nggal ninndi angin tubu yul nap na nenmanggim-nen yusu-o. Nde, Abaram iri-ge nit pidsa nineid-nen yusu-o.

”It-nen lugud tak kwarugwi mende na Mbal Pem Nagawan-nen amberam tak pusu nap min it-nen meya yidnak yemendak pusu nap min-e enalen kali-o. Nagawan Indo-nen at meya yidnak iri-ge wonarusu buk nab-e enalen kali-o” luk yij-o.

Mbal Pem Nagawan engga bem-nen yosolar-e: ”Abaram-e Mbal Pem Nagawan ebem nak indi angin tubu yidnak pem-e Mbal Pem Nagawan-nen at lud tak nak ibij-o” luk yid nar-o.