Popular Bible Verses from BANGSALAN 2

Share

PANGERAN se apareng hekmat ban dhari Salerana manossa narema pangataowan ban pangarteyan.

Tarema pa-apa se eajarragi sengko' reya, na', ban kaenga'e terros tang babala'an ka ba'na. Tetene apa se bicaksana ban ehteyarragi sopaja ba'na pahama ka maksodda. Onggu na', ehteyarragi sopaja ba'na andhi'a pekkeran se tajem ban nyo'on sopaja ba'na eparenge pangarteyan. Sare jareya pakantha se nyare emmas, serser pakantha se nyerser arta se tabendhem. Kalaban cara se kantha jareya ba'na bakal taowa apa artena tako' ka PANGERAN ban ba'na bakal olleya pangataowan parkara Allah.

Oreng se atena berse ban tadha' calena eparenge partolongan ban pangaoban. Pangeran ajaga reng-oreng se adil, sarta ngaobi reng-oreng se taresna ka Salerana.

Sabab oreng se odhi'na atoro' ka kasokanna Allah, iya areya reng-oreng se berse atena, jareya se ngennengngana nagara se ejanjiyagi Pangeran. Tape oreng se jahat ban dusa bakal ebuwanga kalowar dhari nagara jareya bi' Allah, akantha rebba se edabu' dhari tana.

Ba'na, na', tanto bisa nolak mon ecacae babine' se nakal se aehteyar ngangguy ca'-oca' se manes sopaja ba'na kapencoda. Babine' jareya ta' esto ka lakena sarta loppa ka janjina ka Allah.