Popular Bible Verses from YESAYA 61

Share

Kuasa nu Tumpu Anu Matangkas na Kuasanyo aiyamo hi belengku; Ia nompile'imo aku ka' nonsaimo aku da momboa lele ma'ima' hi mian anu kasiasi ka' mompa'alin mian anu ihansunmo na kinyonyoanyo; da mombebakon hi mian anu tinahanmo saba' aha malia'mo opobebas, ka' hi to mia-mian i uno nu talungku' saba' aha osabatakonmo. Ia nonsaimo aku da mompolele saba' tokamo na tempo'nyo Tumpu momposalamatmo; da mohase'mo iwi-iwi' na mian anu sinusa'mo ka' mombalosakon mo sampobali' nu aha; da mombee'i kabilahian ka' kalame'an hi mian anu sinusa'mo nakinyonyoanyo kalana koanumo sinilaka; da momabli'imo kinyonyoa nu aha sisinusa'mo timbalimo nyanyian bau pompuji'. Aha sumomo kau' anu pinosi su'an nu Tumpu. Aku mombaumo anu ma'ima' ka' totu'u, sahingga Tumpu opopodaka'mo.

Kalana belemiu nohumpakmo ambang pininduan lipat ka' kino kalakuanmo anu ma'idek ka' suele pinopo'ambangmo, binaumo bagian nu belemiu sahingga belemiu nohumpakmo bagian pinduan lipat i lipu' nu belemiu ka' mohumpakmo kasanangan sape toka sidu-sidutu'.

Yerusalem notataemo, “Aku i lame'mo kalana Tumpu, kinyonyoangku binilahimo kalana Tumpu. Susumo boting mo'ane ka' boune nompakemo mainan anu toto ima-ima' hondo, sumo atina'mo na Tumpu nompopusok mae hi belengku baju' kasalamatan ka' kamangan.

Aha mombaumo to kota-kota' anu pininmo na na'idek ka' mompotinjomo tampat-tampat anu pininmo na i liing.

Mimbalu-balu' bine' anu sinaumo tumuu'mo timbali pomulaon, sumo atina'mo na Tumpu mompotokamae kasalamatan ka' iwi-iwi' na bansa mompuji'mo Ia.”

Belemiu osanggohije posaihon nu Tumpu ka' osanggohimo imam nu Tumpunto. Belemiu mongoa'ije kakaya'an nu to bansa-bansa ka' bilahimo kalana halata' nu aha.

Tumpu notatae, “Aku mongka'ima'i ka'adilan ka' mongka'ideki anu saja' monsansala' tiba palabuatan ma'idek. Ku bee'je na pontamboi beleyum anu madi' sala-sala', ka' mojanji' tiba belemiu sampe toka sidu-sidutu'.