Popular Bible Verses from Ibarani 11

Share

To nitiꞌi pepoꞌohi, palaihana: hapo to topohinaru pe Pueꞌ Ala, tobahaꞌ bateꞌna hingkiꞌ mewali. Kehapoꞌi handoaꞌi tene toꞌokiꞌ hapo to totopekau, mononto i lalinta hingkiꞌ mewali. Nokomi pepoꞌohira toaꞌ hampiha, nopomotanaꞌhi Pueꞌ Ala.

Mewaliꞌ tobahaꞌ mpololeke: hawaꞌi uwaꞌ toaꞌ to mampomotanaꞌ Pueꞌ Ala ane hawaꞌhi mepoꞌohi pe Io. Alaꞌ toaꞌ to mangkododungkui Pueꞌ Ala hangangaa robahaꞌ i lalira: Io bateꞌna uwaꞌ, hante bateꞌna hingkiꞌ mampaꞌani howonina to moromiꞌ pe hihimolu to tuꞌu-tuꞌu mangkodokoꞌi mpololeke pobahaꞌ Pueꞌ Ala.

Nokomi pepoꞌohinta, tobahaꞌ koPueꞌ Alana to mowali to handoaꞌi uwaꞌ ka uluꞌana iomo duniaꞌ hante lekiꞌ-lekiꞌna ohina.

Nokomi pepoꞌohina hi Burahima, io mampetuntui hawaꞌna Pueꞌ Ala. Pueꞌ Ala mowowoiꞌi hei morumbaꞌi nolou pe woiꞌ to moꞌela, Notiꞌi woiꞌ to Notidoꞌki tiꞌo hingkiꞌ mewali dolaꞌna hi Burahima hei dolaꞌra muleꞌna. Mewaliꞌ kehapoꞌi hawaꞌi nobahaꞌ hi Burahima i imbo koꞌakoane, io molai motuntuni hawaꞌna Pueꞌ Ala. Ikohupaꞌna i woiꞌ tiꞌo, nopoꞌohi nturusi dandine Pueꞌ Ala tiꞌo. Hi Isaki anaꞌna, hante hi Akoꞌ oꞌuweꞌna, mantorimohi woꞌo dandina Pueꞌ Ala tiꞌo. Kehapoꞌi woiꞌ tiꞌo hingkiꞌ mewali dolaꞌra, angkana meꞌohaꞌhi itoꞌo mewaliluhi to mehupaꞌ, hawaꞌi uwaꞌ tambire hadoduo, meꞌohaꞌluhi i lali bambaruꞌ

Nokomi pepoꞌohina hi Nohoꞌ, io mampetuntui hapo to nohawaꞌ Pueꞌ Ala, alaꞌ Pueꞌ Ala mampatiꞌiki kohingkiꞌ uwaꞌna uwai to molobuꞌi duniaꞌ. Mewaliꞌ, kehapoꞌi handoaꞌi tene noꞌokiꞌ to mewali angkana nopetuntui mpuꞌu hawaꞌne Pueꞌ Ala horiana mowali duanga to kodeꞌ hingkeꞌna io moꞌawa hante hantambina hei anaꞌna hawaꞌhi hingkiꞌ mahi podu. Lekiꞌ-lekiꞌna toaꞌ ntaniꞌna i duniaꞌ nihuku, angkana nokomi pepoꞌohina, hi Nohoꞌ norekeꞌ Pueꞌ Ala toaꞌ to mononto i pampeꞌeleNa.

Nokomi pepoꞌohina hi Henoꞌ, io hawaꞌi mahi, angkana niꞌoreꞌ ka duniaꞌ hieꞌe i tempona tene tuwuꞌ. Hawaꞌi uwaꞌ to pahua wotana, alaꞌ Pueꞌ Ala moroaꞌi ka duniaꞌ hieꞌe. I lali Suraꞌ Mangkolehi teꞌukiꞌ ikohandoaꞌana tene hi Henoꞌ niꞌoreꞌ, io mampomotanaꞌ lalina Pueꞌ Ala.

Nokomi pepoꞌohina hi Abeli, io mampewei pe Pueꞌ Ala popenombana to meliu komoromiꞌne ka popenombana hi Kai kokaꞌna. Tobahaꞌmo koꞌuwaꞌna pepoꞌohina, alaꞌ motanaꞌ laline Pueꞌ Ala mantorimo popenombana. Hei alaꞌ pepoꞌohina, hi Abeli norekeꞌ Pueꞌ Ala toaꞌ to mononto i pampeꞌeleNa. Kehapoꞌi mahimo, angkana nokomi pepoꞌohina, hi Abeli mewali pandiri' i ingkiꞌ to tuwuꞌ hinewowoꞌena.

Nokomi pepoꞌohina hi Burahima, io hante hi Sara moꞌanaꞌhi kehapoꞌi io toꞌamamo hei hi Sara hantambina lalo. Tiꞌo mewali alaꞌ nopoꞌohi i lalina hi Burahima kohingkiꞌ nobuhoꞌine Pueꞌ Ala dandiNe.

alaꞌ hi Burahima mampekau haꞌanu kota to hingkiꞌ nopopewali hei noꞌaro Pueꞌ Ala. Kota tiꞌo hingkiꞌ uwaꞌ nturusi wute nantolou-louna.

Nokomi pepoꞌohina hi Musa, i temponamo kodeꞌ, hawaꞌi nolei nitiꞌi oꞌuweꞌna datu toMasiri. Hawaꞌi nolei tuwuꞌ i komotanaꞌ-tanaꞌ to hampaiꞌlu to hingkiꞌ mangkomiꞌi pe lali dosa, angkana nolei tene tuwuꞌ i lali komaporiꞌ moꞌawa hante toaꞌna Pueꞌ Ala. Meliu tene konopotanaꞌne hi Musa nipariwoiꞌ nokomi pepoꞌohina pe Datu Topohompoꞌ hintina pahua komanobaꞌna kodatua i Masiri, alaꞌ io mepohinaru mpololeke hingkeꞌna nohua howonine to kodeꞌ ka Pueꞌ Ala. Hi Musa mampolihi woiꞌ Masiri alaꞌ pepoꞌohina, hei hawaꞌi morokaꞌ ka kobukotana datura toMasiri. Io tungkuꞌ nturusi i tungkaihana, hibalimo to pangkiꞌ Pueꞌ Ala to hawaꞌi wadi noꞌokiꞌ toaꞌ.

Nokomi pepoꞌohina hi Burahima, i tempona nopampeꞌelei Pueꞌ Ala, io nolou mampewei hi Isaki anaꞌna to hadoduona hingkiꞌ nowali popenombana. Ka uluꞌ-uluꞌna, notiꞌikimo Pueꞌ Ala pe io, “Moliu anaꞌmu tiꞌo, hingkiꞌ pahuako woriꞌ muleꞌmu motuntuni hapo to Kudandikiko.” Angkana kehapoꞌi uwaꞌmo dandi tiꞌo, hi Burahima bateꞌnalu mampatimomo anaꞌna to hadoduona hingkiꞌ norereꞌ

Nokomi pepoꞌohina hi Raha, kehapoꞌi io to mampobaluꞌ wotana, angkana io hawaꞌi nirokoꞌ moꞌawa hante tohabobolaꞌna i Yeriko to hawaꞌhi mengkoruꞌ pe Pueꞌ Ala. Tiꞌo mewali alaꞌ io mantorimo mata-matara toSaraeli i tambina, hei nosulungihi.

Nokomi pepoꞌohira, toSaraeli mewutehi i Tahiꞌ Momeaꞌ hibaliluhi matengkaꞌ i lorina. Angkana toMasiri to mepodapaꞌ mahihi podu kolentuꞌara mewute i tahiꞌ tiꞌo.

Nokomi pepoꞌohira, toSaraeli motuleiꞌihi bente kota Yeriko pitu ando komoruene. Koꞌukoana mokero bente tiꞌo i ando kapitu.

Nokomi pepoꞌohina, io mampetuntui hawaꞌna Pueꞌ Ala, hingkeꞌna mowali adaꞌ Ando Posusaꞌ Pokalintora toYahudi to uluꞌ-uluꞌna, hante norumbaꞌhi toSaraeli mampewewuiki raꞌana anaꞌ gimba i wambaꞌ tambira, hingkeꞌna ane moliuꞌi malaꞌeka to merorokoꞌ, anaꞌra tokokaꞌ hawaꞌi hingkiꞌ nirokoꞌ hibali anaꞌra toMasiri tokokaꞌ.

Nokomi pepoꞌohina hi Yusuf, i tempona hingkiꞌ mahi, io mampololita kohingkiꞌ polaira muleꞌna toSaraeli ka woiꞌ Masiri. Hei io meꞌowili, hingkeꞌna ane molaihi ka woiꞌ Masiri, ane mahiꞌi intu wukuna hangangaa rokomi mahuliꞌ nolou pe woiꞌ Kanaꞌa.

Nokomi pepoꞌohina hi Akoꞌ, ikohandoaꞌana tene mahi, io mobarakati oꞌuweꞌna, anaꞌnahi hi Yusuf to roduo. I tempo tiꞌo io mebantutuꞌ i doe lolaiꞌna, menomba pe Pueꞌ Ala.

Nokomi pepoꞌohina hi Isaki, io mobarakati hi Akoꞌ hante hi Esau anaꞌnahi hei mampokonontokihi hapo to hingkiꞌ mewali i lali kotuwuꞌra.