Popular Bible Verses from ÙRÙM 4

Share

Aberaham etaùken Ala oba atì'nogo hìpìrìk motok logolìk, “Ala nen abok yogonesike a'nogo, ebe asigin a? Sùge asigin a,” ìlùk wenesùgì ebetì'lek welagaike. Atì'nogo etaùken Ala ba hìpìrethìlìk welagaike atì ba omamethikenem Ala hogoratì lagaike. Atì'nogo hogoratì logolìk, “Ala re, yì mene tì mene hagasusak elok enek a'nogo nen abok yogonesike atì, ebe asiginat o,” ìlùk wenesùgì kasuk hogoat welagaike.

Wene atì hesik Ala nen Aberaham mel yogosike: “Yì apùnì tì apùnì inùkùl etage apigat inopase re, hat menhagagì o,” ìlùk yogosikomo helal waganogo hesukwa. Atì'nogo yogosikomo re, at Aberaham a'la nen he, “At Ala re, apùnì warek mene inelugurinapìk, nen, yì mene tì mene lek mene ane ba weregethìgìk, ikerek mene nen abok yogonete atì eberogoat yogonete o,” ìlùk etaùken oba hìpìrethesike atì.

At Ala nen he, nit at ane sagalogo heraksìlìk weak hagatì lago atì nen he, Yesùt ebe apùnì nen wasuagalùk pelakhei wagaikomo ebe wasukwama re, hobuk, “Ùkùm hit hinoba mene korogo wokhìgì,” ìlùk, at ninom ninapotkwe hùnogo hinagalùk eluguthesike atì.

At Aberaham en he, “An nen tagokwe mene atì'nogo haga'lasugun,” ìlùk a'la akasak motok le'maat he, “Eberogoat haga'lasigin,” ìlùk etaùken Ala oba hìpìrethìlìk motok hagatì lagaike atì ba, Ala nen he, “Hat en tagokwe mene motok apik yì'nogo asugun o,” ìlùk abok yogosike higit hogoat, yì apùnì tì apùnì inùkùl etage apigat inopase Aberaham at agaike atì.

Halok he, Ala oabùt hano nen welegat wo'nisikerek, ìlùk uagalùk he, ninetaùken at oba hìpìrethikenem abok isike mene atì, wo'nisikerek atì. Nit at en tagokwe mene wene Ala nen ninasuk wasike wene atì hologo higit hogo hagatì logolìk, ninetaùken Ala oba hìpìrethogorek mene hùgì nek wo'nisikerek hùk. We, Aberaham it aike ninom obogat ninopasema re, it atì at Aberaham etaùken Ala oba hìpìrethesike atì hak, inetaùken Ala oba hìpìrethagarek mene hùgì wogisikeregat o.

“It apùnì inasuk ware'lek kolo hagatarek mene, Ala nen sagalogo heraksìgìk, weak hagatarek mene, sebelogo heraksìgìk, ike mene hùgì ina'la hai hakoak o. Nen, it apùnì aike weak hagatarek mene hesik, ninopase Ala Etagepogot en eken hìlìk ùkùm inoba hìgì'lek mene hùgì ina'la hai hakoak o,” ìlùk isikomo helal waganogo hesukwama werek.

Ala ane helal waganogo hesukwa atì ba nìkì'nogo isukwa nogo. Mel isukwa lek nogo? Aberaham etaùken Ala oba hìpìrethesikomo re, at Ala nen he: “Hat hoabùt higit hogo hagatì logou hak, hetaùken noba hìpìrethegenma, ùkùm hoba mene korogo wokhìgìrìk, hapotkwe neperak hùnogo hagagì atìat o,” ìlùk yogosikomo, helal waganogo hesukwa.