Popular Bible Verses from Efesus 4

Share

Togot diyalok nen, kit-kit kinobabut enago inaʼbuwarogo kagarinako dogolik, kit weyak kagako lagagip mende at Kristus nen sagalogo deget disike mende, Allah nen deget diyasike eti kagat, kinagarlagi kinirugi amberek nen weyagat kinako kalok, wene eti deget diyasi dogono o.

Kit-kit naʼbuwa-kaʼbuwarogo yamagiyigik, kibitngge-yogongge kinendainggen sebekogo kagakik, kinobabut enago welagik, kinobakanini kambuk yiluk welagik, kagako dogono o.

Wenenggak yuwogoluk kalok, weyak mende yisi dogogup o. Wene pano mende yisinem it amberek inendainggen awan mende inasuk kolugun mende eti, Allah nen panorinakonem, inendainggen korle asuwagaluk, wene pano mende arlek yisi dogono o.

Inane korle weyak yigik, inakla ket-mbet yigik, inakla agaga dagigik, wene onggo-onggo yigik, inenggalat inabok weyak mbalkik, yiligogi mende eti togot diyasi dogolik, weyagarinabigogi mende inom taʼbokogonat togot diyasi dogono o.

Kinakla agaga dagasi kalok, weyak kagakup. Kinakla agaga ambik werekma, Iblis nen kinakla nggagalunogo yiluk, o mulinggi nggobokogo unggigidek werek nggorlek, sagalogo panoratno o.

Alebagik, kinakla yi warlok ndi warlok ambasi lagagip eti nen nuket dinagisinem, kinebe elamat larik lagagip eti paga, kinobabut alep mende eti su nonggorlogo togot diyiligogi kak, togot diyano o. Eti togot diyalok, kinendainggen inom, kinakla ebeko lagap mende eti inom, Allah nen kinobabut ngget mende kagat kinako dogowak o. Kinebe eberogonat, at Allah nen enggaerek ake ʼbakalok, at nen, kinobabut motogo kagako dogowagaluk, at obabut negen ngget mende kagat kinake mende eti su ngget yikiligogi kagat yikasi dogono o.

Allah Agurengge nen ninebe omanggiat kunogo ʼbinanggemo dogolik, ninebe pano dambukogo werek eti mende nggogot disi dogono o.

Nen, sumbusogo wusagisa wagike eti ebe, nit Allah aʼburi ninebe taʼbokogonat Kristus ebe negen werekma, o paligogi kak palogo ʼbinanggonem, ninebe taʼbokogonat Allah ake kagako dogowagaluk, ninebe dombok ninayonggo ʼbiluk mendinanik lagike o. It amberek Allah wene wolok lowagaluk inayonggo ʼbigik, it amberek Allah wene yogisasi dogowagaluk inayonggo ʼbigik, it amberek pano wene akoni sikmangge inake yogisilik lowagaluk inayonggo ʼbigik, it amberek Allah aʼburi inanggorlem dogolik wene yanggul isasi dogowagaluk inayonggo ʼbigik, ninebe dombogat esigit diluk ninayonggo ʼbisike o. Esigit diluk kagako dogoluk, ninendainggen at oba panggot diluk dogolik nen, ninebe omanggiat mende negen kagat lagik, Allah aʼbut eti ebe dikogo ninilu agik, at Kristus yi mende ndi mende pasik endainggen ʼbogokogo korle mondok dogoligogo kak, nit ninendainggen esigit dilugat korle agik, kagasugun o.

Esigit diluk kagako dogolik, ninobabut elege inobabut kwiyakne nen i kokdabu sabulogo lagik-wagik kagarigogo eti kagat, nit esigit diluk kagako dogowak nen yiluk, it akoni amberek inobabut mirlok-marloksek mende nen inenggalat mende, eberogonat salek nuket dinanuwogoluk, wene ninat wene alep-yabungga yoknisaligogi eti inane kolusak dek o. Mende, ninobabut inarluwendek inobabut negenat waganggo dogusak. Akoni inebe inaʼbuwarogo dogolik, wene eberogonat mende arlek yigik, yi mende ndi mende ake kagako dogolik ninewe Endaganggok Kristus endainggen ʼbogokogo korle dogolik kagako lagike kak kagakik, kagako dogolik, at obabut waganggo dogusak o.