Popular Bible Verses from Mavingu 3

Share

Themba ka MKOMA ngu yotshe mbilu yako, kambe u nga thembe mapimo ako upune. Alakanya ene ka totshe tinzila tako, se ene a na lulamisa tinzila tako.

U nga ti wone u di txharihile upune; thava MKOMA, kambe hambana ni kubiha.

Dhunda MKOMA ngu thomba yako, ni sotshe so khata sa mu ka dibhindu dako; se sisangala sako si na tala ngutu, kambe mapipa ako ma na thekelela ngu vhinya.

Wunene ni kuthembeka si nga ku leke; si sungelele thamoni kwako; si bhale ka txileti txa mbilu yako.

Mwanangu, u nga eyise silayelo sa MKOMA, kambe u ngave ni txihenyisani va txi kukawuka. Nguko MKOMA a kawuka wule a mrandako, kufana ni tate, ka mwanana wule a mnavelelako wunene.

Mwanangu, u nga divale kulaya kwangu, kambe mbilu yako yi na vekete milayo yangu. Nguko milayo yi na engetela masiku ako, kambe yi na kuengetela malembe a kuhanya ni kuthutha.

A katekile m'thu wule a manako wutxhari, ni m'thu wule a manako wuzivi. Nguko i txhuko siya sa wutxhari kupinda siya sa silivhela, ni dibhindu da kona kupinda nzalama yo hehuka. Wutxhari mbunene ngutu kupinda sotshe so navetisa, ni sotshe si u nga sikotako ku si navela, kha si na ku dinganiswa ni wutxhari.

U nga va tone somaha a vale si va lumbako, na mtamo wo maha eto wu di manzani kwako.

MKOMA, ngu wutxhari, a vangile mafu; e veketetela nzuma ngu wutxhari.