Popular Bible Verses from ROMA 1

Share

Mateppe' senna'ka ri Karéba Madécéngngéro, nasaba iyaro karébaé iyanaritu awatangenna Allataala untu' passalama'i sininna tauwé iya mateppe'é; mula-mulanna tau Yahudié sibawa bangsa laingngétto.

Saba' nasibawang iyaro Karéba Madécéngngé, nappaitangngi pékkugi carana assisumpungenna rupa tauwé sibawa Allataala mancaji madécéng paimeng; carana iyanaritu mateppe' ri Allataala, mappammulai pammulanna lettu paccappureng. Iyaro pada-padai tarokié ri laleng Kitta'é, “Tau mateppe'é ri Allataala angkanna assisumpungenna sibawa Allataala madécéng paimeng, iyaro tauwé tuwoi matu!”

Sipongenna napancaji Allataala linoé, sipa'na Allataala iya dé'é napaita, iyanaritu keadaan-Na selaku Allataala sibawa akuwasan-Na iya mannennungengngé, weddinni najeppui rupa tauwé naolai sininna iya puraé napancaji. Jaji dé' sises-siseng rupa tauwé nappunnai alasang untu' pattongengngi aléna.

Rupa tauwé naissengngi Allataala, iyakiya rupa tauwé dé' napakalebbii selaku Allataala sibawa dé'to natarima kasi ri Aléna. Sibalé'na mappikkiri'i rupa tauwé iya tessiratangngé; mapettanni atinna mennang.

Allataala iya tongengngé, nasulléiwi mennang sibawa iya dé'é natongeng. Tenniya iya mappancajiyé sangadinna iya ripancajiyé ritu nasompa sibawa natumaningi mennang. Padahal iya mappancajiyé ritu harusu' ripoji mannennungeng! Aming.

Polé ri surugaé nappaitangngi Allataala cai-Na lao ri sininna dosaé sibawa jana tolinoé, saba' jaé lawa-lawaiwi tolinoé untu' missengngi pappagguruwang tongengngé passalenna Allataala.

Nasaba napogau'i rupa tauwé makkuwaéro, nanaleppessangngi Allataala mennang turusiwi napessunna iya matunaé. Sining makkunrainna dé'na natattaré' lao risining worowané pada-pada biyasaé ri rupa tauwé, sangadinna tattaré'i lao ri padanna muto makkunrai. Makkuwatoro worowané; dé'na mennang nasisumpung makkunraié pada-pada biyasaé, sangadinna naéloriwi padanna worowané. Napogau'i worowané pangkaukeng mappakasiri-sirié lao ri padanna worowané, angkanna tarimai mennang pakkabale iya siratangngé sibawa pangkaukeng majaéro. Nasaba dé' namarasa parellu rupa tauwé missengngi Allataala, na Allataala leppessangngi pikkiranna mancaji masolang, angkanna napogau'i mennang gau'-gau' iya dé'é nawedding napogau' mennang.

Napérasai mennang aléna mapanré, padahal madonggoi mennang. Tenniya Allataala iya mannennungengngé nasompa mennang, sangadinna dato'-dato' iya sinrupaé mahlu' weddingngé maté; iyanaritu rupa tauwé, manu'-manu'é, olokolo iya eppaé ajéna, sibawa olokolo makkalolo'é.