Popular Bible Verses from HAKING-HAKING 7

Share

Makkedai PUWANGNGE lao ri Gidéon, “Maéga senna ana' buwamu. Dé' umaélo mpéréngngi apakalang mennang lao ri tau Midiangngé, saba' napikkiri'i matti mennang pakalai nasaba awatangeng rialéna, angkanna dé' napojika.

Namakkeda PUWANGNGE lao ri Gidéon, “Nasibawang iya telluratu tau lépe'éngngi uwaiéro, maélo-Ka paleppe'ko sibawa mpérékko apakalang lao ri tau Midiangngé. Suroni laingngé lisu.”

Jaji, appallebbangenni lao ri ana' buwamu, ‘Niga marasa métau, harusu'i mapperi-peri salaiwi iyaé Bulu Giléad nanalisu ri bolana.’ ” Na engka 22.000 tau lisu; na banna 10.000 monro.

Nanakkedasi PUWANGNGE lao ri Gidéon, “Maéga senna mupa ana' buwamu. Tiwii mennang ri saloé. Kuwaro maélo-Ka sisérekko. Rékko makkeda-Ka lao ri iko, ‘Iyaé tauwé harusu'i lao sibawakko,’ harusu'i lao. Iyakiya rékko makkeda-Ka, ‘Iyaé tauwé dé' nawedding lao sibawakko,’ dé' nawedding lao.”

Nanatiwini Gidéon iyaro sining tauwé ri saloé, namakkeda PUWANGNGE lao ri Gidéon, “Tau iya lépe'éngngi uwai pada-pada asué, harusu'i mupallaing polé ri tau iya makkaluttué untu' ménung.” Na engka 300 tau iya lépe'éngngi uwai polé ri limanna; sininna laingngé makkaluttu untu' ménung.