Popular Bible Verses from 1 KORINTUS 13

Share

Tau iya mamaséiyéngngi tau laingngé, sabbara' sibawa makessing ati. Dé' narédé angémpurunna, dé' naggempung, sibawa dé' namatempo. Dé' namingki sibawa dé' namakasara', dé' napassai tau laingngé untu' maccowériwi élo aléna, dé'to namasitta tassinggung, sibawa dé'to nakkabale rékko pasalai tauwé ri aléna.

Tahangngi moloiwi sininna séuwa-séuwaé sibawa maélo mateppe' lao ri iya kaminang makessingngé ri tungke' tau; ri laleng keadaang muwi maga iyaro tau mamasé dé' naengka nateddéng paddennuwanna sibawa sabbara'i tajengngi sininna séuwa-séuwaé.

Tau iya mamasé dé' namasennang lao ri majaé, banna masennangngi bawang lao ri madécéngngé.

Jaji, makkekkuwangngéwé engka tellu passaleng iya tette'é ripogau': mateppe', mamménasa sibawa makkamasé. Naiya kaminang battowaé polé ri iya telluéro iyanaritu mamaséiwi sining tau laingngé.

Dé' naengka matu wettunna nadé' naparellu tauwé siyamaséi. Makkekkuwangngéwé engka tau macca palettu'i biritta polé ri Allataala, iyakiya matti mappésauwi matu palettu'i biritta polé ri Allataala. Makkekkuwangngéwé engka tau macca mabbicara ri laleng basa iya makalallaingngé, iyakiya matti mappésauwi matu mabbicara ri laleng maddupa-rupang basa iya makalallaingngé. Makkekkuwangngéwé engka tau iya maccaé missengngi sininna séuwa-séuwaé, iyakiya riséuwaé wettu dé'na nariyapparelluwanna.

Namuni uwulléi mabbicara maddupa-rupang basa tolino, mala muwi sibawa basa malaéka', iyakiya dé' uwamaséiwi tau laingngé, tentu iyaro ada-adakku banna oni iya macennoé dé'gaga bettuwanna.

Namuni maccaka palettu'i biritta polé ri Allataala, majeppuiwi sininna passaleng iya malamungngé; namuni mappunnaika teppe' enrengngé mateppe' senna'ka lao ri Allataala angkanna uwulléi palétté'i bulué, iyakiya dé' uwamaséiwi tau laingngé, tentu dé'gaga bettuwakku!

Namuni iya maneng iya uwappunnaiyé, uwassidekkangngi lao ri tau kasiyasié, sibawa uwabbéréyangngi aléku untu' ritunu, iyakiya dé' uwamaséiwi tau laingngé, iya manennaro dé' sises-siseng gaga appalanna.

Wettukku anana' baiccu mupa, mabbicaraka pada-pada anana' baiccu'é, mappérasaka pada-pada anana' baiccu'é sibawa mappikkiri'ka pada-pada anana' baiccu'é. Makkekkuwangngé battowana; kédo-kédoku iya anana'é uwabbéyanni.