Popular Bible Verses from ROMA 12

Share

Kais hi mituin pah pinan in lomin. So hi mite'un hi nekam, he nati' hi mihin Uisneno In lomin esle' me. Sa' le alekot, le Uisneno anlomi ma teme kun.

Es nane bae benu alki! Natuin Uisneno In nek mamun, au fainek ki, he nati' hi mitulu hi aom on tulu honis ma knino le Uisneno anlomi. Hi luli besa neu Uisneno so onane.

Mimlil nai ambi afnekat neu Usif tunan, malan ambi hamu'it ma amhataniom ambi onen totis!

Kais him paleob lasi amle'ut hen be'u ki, mes him be'u lasi amle'ut meki lasi alekot!

So hi manek es nok es on bae manekat ma hi milile mihunun fef tola ma han tola.

Lasi manekat nane kais nok asafanu. Miskotun lasi amle'ut ma hi mo'e lasi alekot.

So hi mami he nati' him halan nekaf mok ale atoni ok-oke.

Bae benu manekat! Kais him seunbanin lasi amle'ut neu es. Him fe mainuan neu kuasat Uisneno, fun antui nani anbi Sulat Knino nak, “Usif tunan nakua a'an nak: Aseunbanit nane es Au, of Au es seunbanin.”

Hi mepu nok makoet ma kais him peh. Hi mepu hem tuthae Usif tunan natuin Smanan Knino.

Natuin halinat knino, le Uisneno anfe nalali neu kau, au fainek ki alki. Kais hi mitenab ale lasi namnanu nesin na'ko sa' le hi mitenab. So hi mitenab natuin luku nek ateb knino, le Uisneno anbait nani neu ki mes-mese.

Kais him seunbanin lasi amle'ut meki lasi amle'ut. So hi mo'e alekot neu ale atoni ok-oke!

Hi moni nekaf mese ma ansaof mese. Kais hi mitenab lasi amnanut, mes hi mibaunom neu ale lasi an-ana. Kais hi mitenab mak hi ahinet ki!

Mes kalu ho musu namnah, hom fen he nah. Kalu in meon oe, hom fen oe hen ninu! Fun leka hi mo'e onane te, hi mitupu ai fla anbi in fufun. Oke te of in anmae.

Amtek alekot neu atoni le anhamu'i ki, amtek alekot neu sin ma kais amsukat sin! Malin nai mok ale atoni le anmalin. Ma amkae nai mok ale atoni le ankae!

Ambab to knino sin nukat ma miloitan bale neu anao amnemat sin!

Fun onle anbi aof mese, anmu'i lokif taluf namfau. Mes ale lokif taluf nane sin mepu ka papmese fa. Onane amsa hit, maski hit tamfau, mes aof mese anbi Neno Anan. Mes hit mes-mese on lokif taluf es neu es.