Popular Bible Verses from ZABUR 143

Share

Neupeurunoe kheueh ulôn jeuet lôn peubuet meulakée Droeneueh, sabab Droeneueh kheueh Allah ulôn. Droeneueh gét that até, ya TUHAN, dan neubimbéng ulôn bak rot nyang rata.

Tieb-tieb beungoh neupeu ingat kheueh ulôn keu geunaséh Droeneueh, sabab ubak Droeneueh kheueh ulôn meuharab. Neutunyok kheueh bak ulôn rot nyang ulôn jak, sabab ubak Droeneueh kheueh ulôn meudoá.

Ulôn teuka keuneuk jak meulindong ubak Droeneueh, ya TUHAN, neupeulheueh kheueh ulôn nibak musoh-musoh lôn.

Peuseulamat kheueh ulôn nyang sisuai deungon janji Droeneueh, ya TUHAN, deumi keuget Droeneueh, neupeulheueh kheueh ulôn nibak meularat.

Zabur Nabi Daud. Ya TUHAN, neudeungoe kheueh doá ulôn, neukalon kheueh nyang ulôn lakée. Jaweueb kheueh ulôn deumi keuseutiaan Droeneueh, neukabui kheueh doá ulôn deumi keuadelan Droeneueh.

Neujaweueb kheueh ulôn deungon sigra, ya TUHAN, sabab ulôn ka putôh asa. Bék kheueh neumusöm nibak ulôn, mangat ulôn hana lagée ureuëng laén nyang ka jitron u álam mawöt.

Watée lôn ingat uroe-uroe nyang ka leupah; watée lôn pike banmandum buet Droeneueh, ulôn tanueng banmandum karya Droeneueh.