Popular Bible Verses from Wóɖómà 8

Share

À dyuòɛ̀ kà Gèɖèpɔ́ɔ̀ nì kũ̀à nyuɛń ɓó ɔ nyɔ ɓěɔ̀ nɔ̀mɔ̀ dyíin dyé jè ɖé ɖɛ séín múɛ. Ɔ nìɛ̀ nyuɛń ɓó nyɔ ɓě ɓɛ́ wa ɖɛ̀ɓɛ̀ ɔ mú, ké ɔ ɖǎà wa ɖá kà ɔ nyuà gbɔ poɛ kɛɛ bìì.

Sepóɛɖé ḿ dyuòɛ̀ dyí jɛ́ɛ́ kà ɖɛ ɖò se à Gèɖèpɔ́ɔ̀ ɖɛ̀ɓɛ̀ǐn-ɖɛ̀ɓɛ̀ǐn nìà ɖé Kɛ́ɖɛ́ì Jízɛ̀ mɔ̀à à Bounɓoɔ̀ kɛ múɛɛ gbo zàà ɓɛ́ìn gàná cáa. Gĩɔ kè fɛ̀ɛ̀ kè ínjà ɓěɔ̀ kè nyɔ-wuɖuí-kɔ̃̀-nyɔ̀ ɓě kè ɖɛ ɓě nì kàǔn kè ɖɛ ɓě ké dyiɛ kè kpé ɓě kè ɖɛ nì ɖé dyiíɛ ɔ kè ɖɛ nì ɖé hwuɖuɛ, hwɛ̀ ḿ po níiń, ɖɛ séín ɓě ɖǎ ma mɛɛ ɖò, wa se à Gèɖèpɔ́ɔ̀ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ nìà ɖé Kɛ́ɖɛ́ì Jízɛ̀ múɛɛ gbo zàà ɓɛ́ìn.

Kà dyúáɖòɔ̀ kǎà Zùùɔ̀ kpá à gbo ɖé à kpéí-hwɛ̀-hwɛ̀ɔ̀ mú. Sepóɛɖé à se Gèɖèpɔ́ɔ̀ ɓaà dyuò cá kà à ɓéɖé ɓɛ́ à ké ɔ ɓaà nyu nɔ̀mɔ̀ dyíin nyɛ. Zùùɔ̀ mìɔùn mɔ̀ à bìì wùɖù-nyɔ̀. Ɔ ní wùɖù cá, kɛɛ ɔ kpò ɖé à hwòɖǒ-dyùàɔ̀ mú, ɖé Gèɖèpɔ́ɔ̀ gbo ɓó à bìì.

Ké xwɛ̌ à mɛ ɖá ɓó ɖɛa jèɛ́? Gèɖèpɔ́ɔ̀ dyi à wáká kɔ̃ nìǐn, nìí, nyɛ́ ɓɛ́ìn à gbo vɔ̃ɔ ɖeɛ́?

Ɔ jèɛɛ, nyɔ ɓě ɓɛ́ wa kè Kɛ́ɖɛ́ì Jízɛ̀ mɔ̀à nyɔ dyúáɖò kɛɛ, zaa-dúún-wáɖá-wáɖá ɖò se wa bìì nì ɖe fɔɔ.

Ɔ jǔ ké nyɔǔn-dyùɛ̀ mɔ́ɔ́-ɖɛ̀ dyi nì fɔ̀nɔ̀-hwòɖǒɔ̀ wuɖuí kɔ̃̀ ní, nìí, ɔ dyà mɛ́-mɛ́. Kɛɛ ɔ jǔ ké ɖɛ Zùùɔ̀ mɔ́ɛɛ dyi nì fɔ̀nɔ̀-hwòɖǒɔ̀ wuɖuí kɔ̃̀ ní, nìí, ɔ dyà fɛ̀ɛ̀ kè gìɖìǐ.

Kɛɛ wɛ̃́ɛ́ kɛɛ, à mɔ̀ nyɔ zi toɔ̀ ɖuɛń ɖé ɖɛ séín ɓě nìà kɛ mú dyììn ɖé nyɔ mɔ̀ nyɔ ɓɛ́ ɔ ɖɛ̀ɓɛ̀ ma kà à múɛɛ mú.

Ḿ poɛ̀n hwìɖǐi kà ɓɛ́ à se gǎ ɓě ɓɛ́ à dyé ɓó tiɛ̀ǐn nyɛ kè dĩ́ín-dĩ̀ìn ɓɛ́ Gèɖèpɔ́ɔ̀ mu à dyí tɛ̀mɛ̀ìn ké ɔ mu à nyíìn nyɛɛ dyí poɛ̀n ɓɛ́ìn fɔɔ cá.

Ɖɛ́ mu à Kɛ́ɖɛ́ì nììn ɖɛ̀ɓɛ̀ǐn-ɖɛ̀ɓɛ̀ǐnɔ̀ gbo zàùn wɛ̃́? Gǎ-dyé-dyé kè ti kàmàǔn-kàmàǔn ɓɛ́ìn nyuɛɛ̀? Ɔ jǔ ké nyɔǔn dyi à gǎ dyéìn, mɔɔ ké mɔ́ dyi à nyu, mɔɔ ké à se mú-po-ɖɔ̀ ɖò ɓéɖéín, nìí, ɔ mu ná kpáùne? Gana-ɖɛ̀ dyi à gbo kpá, mɔɔ ké wa dyi à gàsíà gbo vɔ̃̀ìn ní, nìí, ɔ ɓɛ́ìn náa nyuɛɛ̀?

Ké Gèɖèpɔ́ɔ̀ mɔ̀ nyɔ gmɔìn kà nyɔǔn-dyùɛ̀ hwòɖǒ-dyùàɔ̀ múin nyɛɛ, ɔ dyuò ɖɛ Zùùɔ̀ poìn kà hwìɖǐiɛɛ dyí, sepóɛɖé Zùùɔ̀ wùɖù Gèɖèpɔ́ɔ̀ gbo ɓó ɔ nyɔ ɓěɔ̀ bìì kà ɓɛ́ Gèɖèpɔ́ɔ̀ mɔ́ɔ kɛ.

Sepóɛɖé nyɔ séín ɓě ɓɛ́ Gèɖèpɔ́ɔ̀ Zùùɔ̀ nàìn nyɛɛ, wa mɔ̀ Gèɖèpɔ́ɔ̀ dyú ɓě.

Sepóɛɖé nyɔ ɓě ɓɛ́ wa nyuà wa mìɔùn nììn mɔ́ɔ́-ɖɛ̀ teeɛɛ, ɖɛ waà mɔ́ɔ́-ɖɛ̀ mɔ́ɛɛ kɔ̃̀ waà fɔ̀nɔ̀-hwòɖǒɔ̀ wuɖuí, kɛɛ nyɔ ɓě ɓɛ́ wa nyuà Zùùɔ̀ mɔ́ɔ́-ɖɛ̀ teeɛɛ, ɖɛ Zùùɔ̀ mɔ́ɛɛ kɔ̃̀ waà fɔ̀nɔ̀-hwòɖǒɔ̀ wuɖuí.

Gèɖèpɔ́ɔ̀ se ma ɔ mìɔùn nììn Dyúɔ̀ wìǐn dyé, kɛɛ ɔ zà ma ɔ xwáɖáún, ɓɛ́ ɔ ké ma à bìì gǎ dyé. Nyɔ mɔ̀ nyɔ ɓɛ́ ɔ nyí ma kà ɔ à kɛɛ, ɔ se à ɖɛ séín nyíɛ ɓɛ́ìn kà nyɔ ɓɔ́ìn kà nyɔ ɖɛ xwai kɛɛ̀?

nìí, Zùùɔ̀ mɔ̀ nyɔ kè à nììn zùùɔ̀ poàìn dyí, ké ɔ nyuà zàse kà ɓɛ́ à mɔ̀ Gèɖèpɔ́ɔ̀ dyú ɓě kɛ̀. À dyi ɔ dyú ɓě jǔǐn, nìí, à mɔ̀ nyɔ mu à Ɓǎà dyi-dè-ɖɛ̀ ɓěɔ̀ dyí ɖúùn ɖekè. À mɔ̀ nyɔ mu Gèɖèpɔ́ɔ̀ dyi-dè-ɖɛ̀ ɓěɔ̀ dyí ɖúùn, ké à kè Kɛ́ɖɛ́ì mu wa dyí ɖúùn, ɔ jǔ ké à kè Kɛ́ɖɛ́ì dyi gǎ dyé, ɓɛ́ à kèɔ̀ kè ké dĩ́ín-dĩ̀ìnɔ̀ ɓéɖéín.

Sepóɛɖé fɔ̀nɔ̀-hwòɖǒ ɓɛ́ nyɔǔn-dyùɛ̀ mɔ́ɔ́-ɖɛ̀ kɔ̃̀à wuɖuíɛɛ, ɔ vɔ̃ Gèɖèpɔ́ɔ̀ gbo. Ɔ se Gèɖèpɔ́ɔ̀ gmaɔ̀ dyi kpɔ̃. Ɔ seɛ dyi kpɔ̃ɔ ɓɛ́ìn fɔɔ.

Sepóɛɖé ɓóɖó ɓɛ́ Gèɖèpɔ́ɔ̀ mɛà kɛɛ nyu cɛ-cɛ, ké ɔ gmɔ̀ Gèɖèpɔ́ɔ̀ dyú ɓěɔ̀ xwáɖáún wóɖó jè hwìǐ

À dyuòɛ̀ kà ɓóɖó-kpà gàná ɓɛ́ Gèɖèpɔ́ɔ̀ mɛ ma kà kɛɛ dà séín nì kpòɛ̌n kà màa ɓɛ́ ɔ nì poo-gbò ɖeín nyɛɛ kpòà kɛ. Ɔ ɖúó ɖɛa nyuɛń dyíɛɛ, ɔ ti nìà kà keɛ̀.