Popular Bible Verses from Ìfísĩ̀ɔ̀ 4

Share

Kɛɛ ɓě mɛ nɔ̀mɔ̀ kpeɖeín ɓó nyɔ tɔ̀ɔ̀ ɓě gbo. Ɓě mɛ ɓéɖé wìì-hwòɖò-dyùà. Ɓě mɛ zĩ̀ìn nyɔ tɔ̀ɔ̀ ɓěɛ̀ nyuu-ɖɛ̀ kɔ̃in, kà ɓě mɔ̀ nyɔ nìà ɖé Kɛ́ɖɛ́ì múɛɛ, Gèɖèpɔ́ɔ̀ ɖǎ ɓě nììn nyuu-ɖɛ̀ kɔ̃in zĩ̀ìn nyɛ.

Ɓě mɛ dyà ɓě mìɔùn ɓíɖíi. Ɓě mɛ ɓéɖé hwòɖǒ ɓɛ̀ɖɛ̀ɛ̀-ɓɛ̀ɖɛ̀ɛ̀. Ɓě mɛ ku hwòɖǒ. Ɓě mɛ kùìn ɓě mǔè ɖòɛ̀ kpeɖe hwòɖǒ ɖé ɖɛ̀ɓɛ̀ǐn-ɖɛ̀ɓɛ̀ǐn mú.

Ɓě dyi wùɖùɛ̌n nìǐn, ɓěǐn ɖá ɓě ké ɖɛ gbà ɖò cɛ̃. Kɛɛ ɓě mɛ cɛ̃ nɔ̀mɔ̀ dyíin ɓó ti ɓě ɓéɖé ɓě kéɔ́ ɔ cɛ̃̀ìn nyɛ, ɓɛ́ ɔ ké nyɔǔn gbo kpá, ɓɛ́ ɖɛ ɓě muà cɛ̃ìn nyɛɛ ké mana-ɖɛ̀ jǔ ɖé nyɔ ɓě muà wa wɔ̃́ùn wɛ̃ɛ gbo.

Ɓěɛ̀ hwòɖǒ-dyùà ɓěɔ̀ mɛ ɓɔ́ nɛɛ̀ ɖe. Cɛ̃́ mɛ ɓɔ́ ɓě dyáa. Ɓě táà dyoɖo dyi. Dyoɖo mɛ ɓɔ́ɔ nyuɛ, ɓɛ́ ɓě ké mú páná. Ɓěǐn ɖá ɓě ké wuɖu gbà ɖò po. Ɓěǐn ɖá ɓɛ́ ɓě ké hwòɖǒ kɔ̃in nyìnììn ɖe.

Ɓě dyi dyoɖoún kpáín, ɓě mɛ ma mú, ɓěǐn kɔ̃̀ ɖà nàmàǔn nyu. Ɔ ní ɖá ɓɛ́ ɔ ké ɓě mú dyi gã̀, ɓɛ́ dyóɖó ké zi. Ɓěǐn ɖá ɓɛ́ ɓě ké Nɔɔ́-nàmàǔn pá nyí.

Ɔ jèɛɛ, ɓě táà nyɔ ɓě jǔ ma kà kĩ́ín nyɛɛ jè dyi. Ɔ mɔ̀ nyɔ nyuɛ ké ɓě nyu cĩ́-cĩ́ ɓě nyu ma kà kĩ́ín nyɛ, ké nyɔ-cáìn-ɖɛ̀ ɓě kɔ̃̀ tó nyu ma kà ɓěɛɛ nyuɛ ké ɓě nì ma dyíin nyìnìɛ̌n. Ɓěɛ̀ hwòɖǒ-dyùàɔ̀ kè ɓěɛ̀ hwìɖǐi-poìn-poìn mɛ mɔ̀ ɖɛ ɖìè. Ɓě mɛ kpɔ̃ nyɔ ɖìè ɓɛ́ ɓě ɖǎà jǔ, ɓɛ́ Gèɖèpɔ́ɔ̀ nyu ma ké ɓě nìà kà ɔ mìɔùn nìà kɛɛ gboi. Nyɔ ɖìè jǔ-jǔɔ̀ dyí-dyuò-dyuò mɔ̀, ɔ nyu dyí-sɛ́ɖɛ́ìn-ɖɛ̀, ké ɔ se kɛɛ ɖò ɓéɖé. Ɖɛ nìà kɛ mɔ̀ jǎà cĩ́-cĩ́ɔ̀.

Gbo-kpɔ̃ìn-kpɔ̃ìn ɓɛ́ Zùùɔ̀ nyu ké nyɔ ɓéɖéà kɛɛ, ɓě mɛ vɔ̃ ɓɛ́ ɓě kéɛ dyi kpɔ̃ ɖé gìɖìǐ ɓɛ́ ɔ kpɔ̃àìn ɓě gboɛɛ mú.

Ké ɔ nyíí-ɖɛ̀ ɓě ɓɛ́ ɔ nyí nyɔǔn wɛ̃ɛ, wa mɔ̀, ɓɛ́ ɖíɛ́ ɓě ké àpɔ́sò jǔ, ɓɛ́ ɖíɛ́ ɓě ké kpáá-ɖɛ̀-cɛ̃-nyɔ̀ jǔ, ɓɛ́ ɖíɛ́ ɓě ké bɔ̃̌ nɔ̀mɔ̀ dyíin kpa-nyɔ̀ jǔ, ɔ kè ɓɛ́ ɖíɛ́ ɓě ké pásɔ̀ɖɔ̀ kè nyɔ-ɖɛ-tɛ̀mɛ̀ìn-nyɔ̀ jǔ. Ɔ nyu ɖɛ ɓěa, ɓɛ́ ɔ kéɛ nyu ɓɛ́ ɔ nyɔ ɓěɔ̀ ké kpé ɓɛ́ìn, ɓɛ́ wa ké ɔ kũ̀à nyu, ɓɛ́ Kɛ́ɖɛ́ì kpóɖó-dyùàɔ̀ ké dyi ku. Ké kǎà à séín mu kǎa gbo kpɔ̃ìn nyuùn. Ké à hwìɖǐǐ-taɓa-taɓa kè à Gèɖèpɔ́ɔ̀ Dyú-gààɔ̀ dyí-dyuò-dyuò mu dyúáɖò nììn. Ké wa dyi à kè Kɛ́ɖɛ́ì gbo ɖaɓaìn, ké wa dyi à gbɔ-hwɛ̀-hwɛ̀ɔ̀ kè Kɛ́ɖɛ́ì nììn gbɔ-hwɛ̀-hwɛ̀ɔ̀ gboi kpaìn ní, nìí, à mu ɖɛ hwɛ̀ìn.

Nìí, à se dyú-gbɔ́ɔ́ ɓě jǔɛ mu ɖe. À se ɖɛ ɓɛ́ nyɔ-cá-nyɔ̀ ɓěɔ̀ tɛ̀mɛ̀ìn nyɔǔn wɛ̃ɛ kíɖíí síɛ mu kà dyóó-kpɛ̀ kè pìɔ̌ kpaà ɖɛ ɖò kɛ. Nyɔ-cá-nyɔ̀ ɓěɔ̀ kpàìn nyɔǔn ɖɛ ɓě se jǎà kɛɛ gbo dyììn ɖé waà nyɔǔn-cáìn-ɖɛ̀ ɓěɔ̀ mú. Kɛɛ à mɛ cɛ̃ jǎà ɖé ɖɛ̀ɓɛ̀ǐn-ɖɛ̀ɓɛ̀ǐn mú. Ké kǎà à mu kà kuɛ nyuùn ɖé ɖɛ séín mú, ɓɛ́ à kè Kɛ́ɖɛ́ì ɓɛ́ ɔ mɔ̀à kpóɖó-dyùàɔ̀ dúɔ̀ kɛɛ ké nyɔ dyúáɖò jǔ gàná.