Popular Bible Verses from 2 Kɔ̀ɖéíntĩ̀ɔ̀ 4

Share

Sepóɛɖé à ní dè ɖɛ ɓě ɓɛ́ à po dyéɖé kɔ̃ɛɛ dyé jè hwìɖǐi, kɛɛ à dè ɖɛ ɓě ɓɛ́ à se dyéɖé kɔ̃ poɛɛ dyé jè hwìɖǐi. Ɖɛ ɓě ɓɛ́ à poà dyéɖé kɔ̃ɛɛ nì dyi ziɛń, kɛɛ ɖɛ ɓě ɓɛ́ à seà dyéɖé kɔ̃ poɛń nìɛɛ mɔ̀ sè-ná-sèɛ̀ ɖɛ.

Ɔ jèɛɛ, à hwòɖǒ ní kpá ɖé ɖei. Kpé nì à kpóɖó-dyùàɔ̀ dyí hwɛ̀ǐn dyɛo, kɛɛ ɔ nì kà Gèɖèpɔ́ɔ̀ nìà à hwòɖǒɔ̀ nyuɛń ɖe ɖie ɓó wé séín xwíníín nyɛ. Gǎ à nìà dyéɛń nyɛɛ fɛ̃́ìn xwa, ké ɔ se ɖɛ ɓɛ́ ɔ ké hwèɖèìn nyɛ. Kɛɛ ɔ mu à sè-ná-sèɛ̀ dĩ́ín-dĩ̀ìn dyàùn. Ké dĩ́ín-dĩ̀ìnɔ̀ ɓúá dyí ké ɔ zi gǎ-dyé-dyéɔ̀ dyí vɛ̃in.

Wa pĩ́à à dyi ɖé ɖɛ kò-kò ɓě mú, kɛɛ ɔ ní nyu ké à ní wɛ̀ìn dyi. Hwòɖǒ kpèìn à kɔ̃in, kɛɛ ɔ seɛ nyuɛ ɓɛ́ìn, ɓɛ́ à ké se ɖɛ ɖò nyuɛ ɓɛ́ìn ɖe. Wa nì à kíɖíí, ɓɛ́ wa ké à gǎ dyéìn, kɛɛ Gèɖèpɔ́ɔ̀ ní táà à dyi. Wa po à ɓíɖíi dyi, kɛɛ à ní wɛ̀ìn dyi.

Kɛɛ à mɔ̀ nyɔ ɓɛ́ à ɓéɖéà dyi-dè-ɖɛ̀ kpa ɖɛɔ̀ kɛɛ, à nì kà mɛ-dyàà nìà kɛ. Ɔ nì ná, ɓɛ́ ɔ kéɛ nyɔǔn dyí tɛ̀mɛ̀ìn kà ɓɛ́ kpé zi dyí ɓúáuń mìɔ nìà à múɛɛ mɔ̀ Gèɖèpɔ́ɔ̀ kɔ̃̀ɔ̀-ɖɛ̀ kɛ. Ɔ se à kɔ̃̀ɔ̀-ɖɛ̀.

Ɓóɖó-kpà nìà kɛ nììn gèɖèpɔ́ɔ̀ ɖǎ nyɔ ɓě ɓɛ́ wa seà Gèɖèpɔ́ɔ̀ hwìɖǐǐ taɓaa hwòɖǒɔ̀ kɔ̃in kpèìn. Ɔ nyuɛ náa, ɓɛ́ wa ní kɔ̃̀ ɖà ceɔ̀ dyé. Ceɔ̀ mɔ̀ bɔ̃̌ nɔ̀mɔ̀ dyíin ɓá Kɛ́ɖɛ́ì kè Gèɖèpɔ́ɔ̀ hwɔìn kà jɛ́ɛ́ kɛɛ dĩ́ín-dĩ̀ìnɔ̀ dyíɛ.

Gèɖèpɔ́ɔ̀ cɛ̃ɛ zɔ̃̌ɔ̀, ké ɔ ɖá, “Ceɔ̀ mɛ fã̀ìn ɖé tíe-kpòɔ̀ mú.” Ké Gèɖèpɔ́ɔ̀ dyúáɖòɔ̀ mɔ̀ nyɔ nyuà ké ɔ ceɔ̀ fã ma kà ɖé à hwòɖǒ-dyùà ɓěɔ̀ múɛ̀. Ké ɔ nyí à ce mɔ̀à hwòɖǒ-fɔ̀nɔ̀-fɔ̀nɔ̀ ɓá Gèɖèpɔ́ɔ̀ dĩ́ín-dĩ̀ìnɔ̀ dyíɛ, ké ɔ fã̀ìn ɖé Kɛ́ɖɛ́ì dyúa, ké à dyéɛ.