Popular Bible Verses from 1 Kɔ̀ɖéíntĩ̀ɔ̀ 12

Share

Ɖɛ ɓɛ́ ɔ tɛ̀mɛ̀ìn nyɔǔn dyí kà ɓɛ́ nyɔ ɓéɖé Zùùɔ̀ kɛɛ, Zùùɔ̀ nyíɛ à ɖò-ɖò, ɓɛ́ ɔ ké nyɔǔn gbo kpá.

Ɓě mɔ̀ Kɛ́ɖɛ́ì kpóɖó-dyùàɔ̀, ké ɓě ɖò-ɖò mɔ̀ ɔ wáká ɓěɔ̀ ɖò.

Ɔ jǔ ké wáká ɓěɔ̀ ɖò dyi gǎ dyéín, wa séín dyé gǎ. Ké wáká ɖò dyi ɓàìn-ɓàìn ɓéɖéín, nìí, wa séín kpá múàǔn.

Gèɖèpɔ́ɔ̀ nyí nyɔǔn ɖíɛ́ ɓě hwòɖǒ-fɔ̀nɔ̀-kà wùɖù-wùɖù dyììn ɖé Zùùɔ̀ mú. Ké nyɔ ɖíɛ́ ɓě dyuò ɖɛ ɓě wa ɖǎ cɛ̃́ɛ nyɔ ɓě gbo cɛ̃ɛ dyììn ɖé Zùù dyúáɖòɔ̀ mú. Zùù dyúáɖòɔ̀ nyí nyɔ ɖíɛ́ ɓě hwìɖǐǐ-taɓa-taɓa. Zùù dyúáɖòɔ̀ nyí nyɔ ɖíɛ́ ɓě nyíí-ɖɛ̀, ké ɔ nyuɛ ké wa kánáìn nyɔǔn dyi. Ké ɔ nyí nyɔ ɖíɛ́ ɓě zɛ̃̀ìn-ɖɛ̀-nyu-kpè, ké ɔ nyí ɖíɛ́ ɓě ɖɛ ɓɛ́ Gèɖèpɔ́ɔ̀ dèìn wa wĩín nyɛɛ cɛ̃-cɛ̃. Ké ɔ nyí ɖíɛ́ ɓě kpé, ɓɛ́ wa ké zùù gbà ɓě dyí dyuò. Ké ɔ nyí ɖíɛ́ ɓě wuɖu-dù kà kò ɖò ɓě po-po, ké ɔ nyí ɖíɛ́ ɓě kpé, ɓɛ́ wa ké wuɖu ɓěa mú zà.

Ɖɛ séín ɓěa kɛɛ, wa mɔ̀ Zùù dyúáɖòɔ̀ nyuu-kũ̀à. Ɔ geɛ̀n nyɔ ɓěɔ̀ múin ɖò-ɖò kà ɔ mɔ́ ɓɛ́ ɔ kéɛ wa nyíɛ.

Ɔ nyuɛ náa ɓɛ́ mú-ge-ge ɖò ké se kpóɖó-dyùàɔ̀ mú nì, kɛɛ ɓɛ́ wáká ɓěɔ̀ ké wa mǔè ɓěɔ̀ jè gbo kɔ̃̀.

Nyíí-ɖɛ̀ ɓěɔ̀ kpa kòɛ̀ ɖò-ɖò, kɛɛ Zùù dyúáɖòɔ̀ mɔ̀ nyɔ tò wa. Kũ̀à ɓěɔ̀ kpa kòɛ̀ ɖò-ɖò, kɛɛ wa mɔ̀ Bounɓo dyúáɖòɔ̀ bìì. Kũ̀à ɓɛ́ Gèɖèpɔ́ɔ̀ kpéɔ̀ nyuɛɛ kpa kòɛ̀ ɖò-ɖò, kɛɛ Gèɖèpɔ́ɔ̀ dyúáɖòɔ̀ mɔ̀ nyɔ nìà kũ̀à kò-kò ɓěɔ̀ nyuɛń ɖé nyɔ séín múɛ̀.

Nyɔ ɖò-ɖò ɓě ɓɛ́ Gèɖèpɔ́ɔ̀ ɖǎ cɔ́cì-nyɔ̀ ɓěɔ̀ hwìɛ̀ poɛɛ, wa kɛà kɛ̀. Ɖíɛ́ ɓě mɔ̀ àpɔ́sò. Wa mɔ̀ nyɔ vɛ̀nɛ̀ ɓěɔ̀. Nyɔ ɓě kɔ ɓó dyíɛɛ mɔ̀ kpáá-ɖɛ̀-cɛ̃-nyɔ̀. Nyɔ kɔó dyí ɖeɛɛ mɔ̀ nyɔ-ɖɛ-tɛ̀mɛ̀ìn-nyɔ̀ ɓě kè zɛ̃̀ìn-ɖɛ̀-nyu-nyɔ̀ ɓě kè nyɔ-dyi-kánáìn-nyɔ̀ ɓě kè nyɔ-gbo-kpá-nyɔ̀ ɓě kè nyɔ-wuɖuí-kɔ̃̀-nyɔ̀ ɓě ɔ kè wuɖu-dù kà kò ɖò ɓě mú-wùɖùìn-nyɔ̀ ɓě.

Kpóɖó-dyùàɔ̀ se wáká dyúáɖò, kɛɛ wáká ɓěɔ̀ vò dyí.

Kɛɛ ɖɛ mɔ̀ jǎà jɛ́ɛ́ kɛɛ mɔ̀ kpóɖó-dyùàɔ̀ wákáɔ̀ nyɔ ɓě m̀ dyià dyéìn, ɓɛ́ m̀ ɖá wa seà ɖɛ ɖò kpá kɛɛ, wa mɔ̀ nyɔ ɖé nyɔ ɓéɖé ɓɛ́ nyɔ ké ɓéɖé.

Ɔ jǔ ké kpóɖó-dyùà gànáɔ̀ dyiɔ́ má dyéɖé ɖòùn jǔǐn, nìí, dɛ̌ ɖùǔ mɔ̀ùn jè sèɛ́? Mɔɔ kpóɖó-dyùà gànáɔ̀ dyiɔ́ má ɖùǔ jǔǐn, nìí, xwɛ̌ ɔ muɔ́ ɖɛ ɖòɛ̀ nyɔ́ wɔ̃́ɔ nyuùn wɛ̃́? Kɛɛ kà ɔ nìà kàǔn wɛ̃ɛ, kǎà Gèɖèpɔ́ɔ̀ nyu ma wáká ɓěɔ̀ waà pá ɓěɔ̀ mú poɛ ɖò-ɖò kà ɓɛ́ ɔ mɔ́ɔ ma nyuɛ dyiɛ. Ɔ jǔ ké wa séínɔ̀ dyiɔ́ wáká dyúáɖò jǔǐn, dɛ̌ kpóɖó-dyùàɔ̀ muɔ́ nììn nyɛ́?