Popular Bible Verses from Provérbios 3

Share

Be enga báyipie jogadípise Pangarádejnai Dupade gatuaque enga angureta yui ujetiga chátaja ua. Enga ca báyipiedie chopo quiyíguiyí ome cuchade uje chácariji bádode. Angongara ua aja Dupade gatuaque ujetiga chingo bapesutígo cucha quitígo aja ua jnese iji deréjnane jnese. Jogadi a u jne ujetiga Dupade chingongara dajeque caputai aja ua gatuaque jne ga bajnáji jnumone gatuaque jne.

Ca opise irajatáguiji ua ome cuchade jnese. Mu paraque ua jne enga angaripísi Pangarádejnai Dupade. Enga ayápusu apésu pisijnaringuéone jnese.

Jecucha ga o beduguéjnai iji Pangarádejnai Dupade enga ẽrája ome baplátarigui petígo. Jé chopome bajutícabia te rĩ. Ujetiga ãra bacade cucha enga bajaque Dupade jne ujetiga asi ome bacade cucha petique ome. Ujetiga be yuruode udojo quigode ga a amo jne uje berani casodica uje Dupade chatirépo babai ga sué baja casodica gáyode, uje banasu bacade cucha ga bachagúja piedie mu sué gáyode ga que arajápo jogatique rĩ.

Ca aya bajnoraquei ome bojode ayoréo ore jnese. Ca ayápo baru uréone to rĩ. Cho ujetiga pajopie ojnaquéroragaja udojo aja báyipie jeta ca acadígui. Enga a baparagácho jne uje a gajnúone u bajnápetígo uje bajúna ga badíja betabi enga ore chimo jnese iji betabi.

Yababi á, ujetiga Pangarádejnai atique dosója ua marínga, jé ca aya angári uté. Enga ca arañime udore ome ua. Uje Dupade a cho baquigome cuchade udore jne gu. Pangarádejnai Dupade jé gajnúone u jnanírique uje cho dajnorane dape ore quique. Chamáñaje Pangarádejnai Dupade chijnóra dabode uyoque to gu, enga cho yoquiquique to ome cuchade.

Yababi á, jé ca acadígui yacajnaquéode udojo quigode ome ua jne. Ajuse guio iji báyipie ajei yojningane cucha jnese jne ome ua. A bacuecaringuei umaripise iji erámi tudé enga a barasique ua gatuaque jne ujetiga apésu yojningane udojo cucha ome ua.

A pininaquei gajnesṍri tu gosi ujetiga chise dáringárique áyipierãque jne, jé upome udore ore rĩ uje ore irajatigade chajnera dádi. Yirajágo uje gosi gajnei tuté payuquetotiguei sué ore guẽrapáidedie pláta gáyode, jé aja órodie rĩ. Enga pirajatigai jé chopo rĩ uje sué cucarané ueradedie gáyode to rĩ uje jiei oredie. Suépo cucha pirasigode gáyode jnese rĩ iji erámi údode jnese.

Ujetiga bojórique ayoré chutai ua ome dajmátaringuéi gajnetique cucha ga ajuéga ome ga asi ome, ga jé ca ãra ua iji cuchárique. Asi ome bu.

Chamáñaje Pangarádejnai Dupade jogosórone u pirajatigai, payuquetotiguei ore nanique gu uje pésu gatajnoquei, jnumi ore nanique.