Popular Bible Verses from VHAHEBERU 11

Share

Zwino lwone lutendo ndi mini? Lutendo ndi u vha na ngoho na zwe ra zwi lavhelela, nangwe zwi sa vhonali ra ḓi zwi fulufhela ri sa timatimi. Vha kale vho khoḓwa nga Mudzimu nge vha vha na lutendo.

Hafhu a u koni u takadza Mudzimu arali u si na lutendo; ane a ḓa ha Mudzimu tshawe ndi u fulufhela uri Mudzimu u hone, u pfufha vhane vha mu ṱoḓa nga mbilu yoṱhe.

Ndi nga lwone lutendo ri tshi kona u ṱalukanya uri tsiko yoṱhe yo vhumbwa nga ipfi ḽa Mudzimu, zwine ra zwi vhona zwa bva kha zwi sa vhonali.

Ndi nga lutendo Abrahamu o thetshelesa a tshi vhidzwa nga Mudzimu uri a pfulutshele shangoni ḽe a mu fulufhedzisa ḽone, ḽe ḽa pfi ḽi ḓo vha ḽawe, a sokou pfuluwa a sa ḓivhi hune a ya. Nga lutendo lwonolwo a vha ṱhunḓu shangoni ḽe a fulufhedziswa; a dzula dzidenndeni, na Isaka na Jakopo vhe vha vha vho fulufhedziswa ifa ḽeneḽo vha ḓi dzula-vho dzidenndeni sa ene.

Ndi nga lutendo Nua a songo nyadza zwiḽa Mudzimu a tshi mu sevha zwi no ḓo bvelela, a mu pfa a fhaṱa tshiḽa tshikepe, ha vha u tshidza muṱa wawe. Ene a tshi fulufhela Mudzimu ha vha u haṱula shango uri ḽi laṱwe, ene muṋe a pfi muvhuya nge a vha na lutendo.

Ndi nga lutendo Enokho a songo vhuya a thetshela lufu; o sokou tshenuwa a si tsheeho fhano fhasi, Mudzimu ó ṱuwa nae. Nahone Maṅwalo a ri, a sa athu ṱuwiswa o vha a tshi tshila vhutshilo vhu takadzaho Mudzimu.

Ndi nga lutendo Abele o kona u ṋekedza Mudzimu nduvho dzi fhiraho dza Kaini; ndi nga lwonolwo lutendo Mudzimu o ṱanganedza nduvho dza Abele a ri ndi muvhuya; ndi nga lutendo Abele a tshi kha ḓi amba na ṋamusi naho o no ḓi fa.

Onoyo Abrahamu, naho o vha o no kalaha, tshifhinga tshawe tsha u beba tsho no fhira, na Sara musadzi wawe e muumba, nge Abrahamu a fulufhela Mudzimu a wana maanḓa a u mu bebisa ṅwana, ngauri o ri, “We a mpfulufhedzisa u a fulufhedzea.”

O vha o lavhelela muḓi u re na muteo wo khwaṱhaho we Mudzimu a vha Ene muhumbuli na mufhaṱi wawo.

Ndi nga lutendo Mushe a tshi ri o no aluwa a lamba u pfi ṅwana wa ṅwananyana wa Farao, a nanga u tambudzwa na lushaka lwa Mudzimu, a landula u ḓiphiṋa nga miḓifho ya vhutshinyi i fhelaho; a vhona u nyadzelwa Mesia lu lupfumo luhulu lu fhiraho na madzanga a Egipita; o vha o vhea mbilu kha pfufho i kha ḓi ḓaho. A tshi ṱuwa Egipita ho vha hu si nga u ofha mbiti dza khosi, o itwa nga lutendo; a hana u humela murahu, zwa nga u khou vhona Mudzimu a sa vhonwi nga maṱo.

Ndi nga lutendo Abrahamu o ṋekedza Isaka a mu ita tshiṱhavhelo, zwiḽa Mudzimu a tshi ṱoḓa u vhona u fulufhedzea hawe. Hafhu Isaka o vha e ene ṅwana wawe muthihi fhedzi, nahone o vha o no fulufhedziswa ha pfi, “Vhaḓuhulu vhau vha ḓo bva kha lutsinga lwa onoyu Isaka.” Naho zwo ralo o vha o no ḓiimisela u mu ṋekedza.

Ndi nga lutendo Rahaba uḽa wa phombwe o ponyoka lufu lwa vha nyadzaho Mudzimu, nge a swielela dziḽa ṱholi nga mbilu tshena.

Nga lutendo vho wela Lwanzhe Lutswuku zwa nga vha tshimbilaho shangoni ḽo omaho, Vhaegipita vha tshi ri ri a wela-vho vha nwela khothe ha mbo ḓi vha u lovha.

Zwo itwa nga lutendo Vhaisraele vho ri u mona na mitsheṱo ya Jerikho maḓuvha maṱanu na ḽithihi ya mbo ḓi ri huru fhasi.

Ndi nga lutendo o tea vhuṱambo ha Paseka, a handulula mihangammbwa nga malofha, uri muruṅwa wa bulayo a si kwame matanzhe a Israele.

Ndi nga lutendo Josefa o ri a tshi ṱoḓa u fa a amba nga zwa u pfuluwa ha Vhaisraele Egipita, a vha laya zwine vha fanela u ita nga marambo awe.

Ndi nga lutendo Jakopo o ri a tshi khou fa a shudufhadza vhana vha Josefa vhuvhili havho, a luvha Mudzimu o gogoḓela lubaḓa lwawe.

Ndi nga lutendo Isaka a tshi shudufhadza Jakopo na Esau, a amba zwe zwa vha zwi tshi kha ḓi ḓo itea.