ଏ଼ଦାଆଁତାକି ପ୍ରବୁ ମ଼ସାଇଁ ଏଲେଇଚେସି, “ନୀନୁ ରେ଼ଚା ହାଲାମୁ, ଇଚିହିଁ ନୀନୁ ଏମିନି ଲ଼କୁଣି ମିସର ଦେ଼ସାଟି ହ଼ପ୍ହା ତାତି, ଏ଼ୱାରି ଜାହାରାଇଁ ଲାଗେଏ କିହାମାନେରି। ନା଼ନୁ ଏ଼ୱାରାଇଁ ଏମିନି ଜିରୁତା ତା଼କାଲି ହୁକୁମି ହୀତେଏଁ, ଏ଼ୱାରି ଏ଼ ଜିରୁଟି ତବେ ଏଟ୍କା ଆ଼ତେରି; ଏ଼ୱାରି ତାମ୍ଙ୍ଗେ ତାକି ର଼ ଗାରାତା ୱା଼ରିକିତି କ଼ଡି ଡା଼ଲୁ କେ଼ପାହାଁ ଏ଼ଦାଣି ପୂଜା କିତେରି, ଇଞ୍ଜାଁ ଏ଼ଦାଣି ନ଼କିତା ପୂଜା ହେର୍ପାହାଁ ଏଲେଇଚେରି, ‘ହେ଼ ଇସ୍ରାୟେଲ, ଏମିନି ପେ଼ନୁ ମିଙ୍ଗେ ମିସର ଦେ଼ସାଟି ହ଼ପ୍ହା ତାତାତେ ଏ଼ଦିଏ ଈଦି।’”