Popular Bible Verses from Ĩsa 9

Share

Nĩkwĩthĩwa kana nĩkasyaĩtwe kwondũ witũ, nĩtũnengetwe kavĩsĩ; nako kakanengwa ũtonyi wa kũsumbĩka. Kakeetwa: “Mũtai wa Kũseng'ya, Ngai wĩ Ũtonyi, Ĩthe wa Tene na Tene, Mũsumbĩ wa Mũuo.”

Andũ ala maendaa me kĩvindunĩ, nĩmonete kyeni kĩnene. Ala matwĩe nthĩ yĩ kĩvindu kya ngokomi, yu nĩmamulĩkĩlwe nĩ kyeni.

Ũsumbĩ wake ũkaendeea kwongeleka vinya, na mũuo wa ũsumbĩ wake ndũkathela. Akasumbĩka ekalĩle kĩvĩla kya kĩ-ũsumbĩ kya Ndeviti, na kũsumbĩka ũsumbĩ wa Ndeviti, akaũlũlũmĩĩlya na kũwũendeesya, aitũmĩa sila wa katĩ na ũlũngalu, kuma yu na kũvika tene na tene. Kwenda kũnene kwa Mwĩai Ngai Mwene Ũtonyi W'onthe kũkatuma ũndũ ũsu wĩanĩa.

Iatũ syonthe sya asikalĩ ala me kaũnĩ, na ngũa syonthe ila iindĩtwe nthakamenĩ, ikavĩvw'a na mwaki ithele vyũ.

Ĩndĩ nthĩ ĩla yaĩ na woo ndĩkaendeea kwĩkala kĩvindunĩ kĩu. Ĩvindanĩ ĩvĩtũku, Ngai nĩwatumaa nthĩ ya Nzevuluni na ya Navutalĩ ivũthw'a, ĩndĩ ĩvindanĩ yũkĩte akatuma kĩsio kĩla kĩ ũtee wa ũkanga na nthĩ ĩla yĩ mũingo wa Ũsĩ wa Yolotani, o vamwe na Kalilii vala vekalaa andũ ma nthĩ ingĩ iendeea nesa.

Naku we Mwĩai Ngai nĩwingĩvĩtye andũ ma nthĩ ĩsu, na ũkongeleela ũtanu woo; matanaa me mbee waku, o tondũ andũ matanaa ĩvindanĩ ya ngetha, na o tondũ matanaa yĩla mekũaana mũtavo.

Nĩkwĩthĩwa ĩsoki ĩito yĩla makuĩte, mũtĩ ũla moovetwe ituonĩ, na ndata ya ũla wamathĩnasya, nĩwitũlangĩte o ũndũ weekie ĩvinda yĩla wasindie andũ ma Mitiani.