Popular Bible Verses from Ĩsa 61

Share

Veva wa Mwĩai Ngai Mũsumbĩ e vamwe nakwa, Mwĩai Ngai nũnyuvĩte nĩete ũvoo mũseo kwa ala ngya. Nũndũmĩte nĩvosye ala makw'ĩte ngoo, nĩtavye ala ove kana nĩathasye, na ngĩtavany'a ũthasyo kwa ala me yela. Nũndũmĩte nĩtavany'e kana ĩvinda ya kwonany'a ũseo wake nĩ ĩviku, na mũthenya wa kũĩvanĩsya wa Ngai waitũ nĩ mũviku. Nũndũmĩte nĩkiakisye onthe ala me na kyeva. O ta ũu nũndũmĩte nĩnenge andũ ma Saioni ala me na kyeva ũtanu vandũ va kyeva, mũyo vandũ va kĩĩo na wathi wa kũtaĩa vandũ va kũkw'a ngoo. Makeethĩwa mailyĩ ta mĩtĩ, ĩla Mwĩai Ngai mwene ũvandĩte. Onthe makeekaa ũla ũlũngalu, na Ngai akataĩwa nũndũ wa maũndũ ala wĩkĩte.

Nthoni syenyu na kũvũthw'a nithelete. Mũkatũaa nthĩ yenyu ene, na ũthwii wenyu ũkongeleka kũndũ kwĩlĩ, na ũtanu wenyu ũkekala tene na tene.

Ngatana mũno nthĩnĩ wa Mwĩai Ngai, thayũ wakwa ũkeethĩwa na ũtanu nthĩnĩ wa Ngai wakwa; nĩkwĩthĩwa nũmbĩkĩĩte ngũa sya ũtangĩĩo, na akambw'ĩka ngũa ndaasa ya ũlũngalu, o tondũ mũtwaani wĩyanakavasya na ngovia ya ndaĩa, na o tondũ mũtwawa wĩyanakavasya na syĩndũ syake sya wanake.

Makaaka ĩngĩ kũndũ kũla kwaomboangiwe tene, na kũtũngĩĩa kũla kwaanangiwe tene. Makatũngĩĩa ndũa ila syaanangiwe, ila syatiiwe syĩ nthei ĩvinda ĩasa ĩvĩtũku.

O tondũ nthĩ ĩmeasya syĩndũ, na o tondũ mũũnda ũtumaa kĩla kĩvandĩtwe vo kĩmea, now'o Mwĩai Ngai Mũsumbĩ wĩtuma ũlũngalu na kũtaĩa syĩthĩwa andũnĩ ma mbaĩ syonthe.

Mũkeetawa athembi ma Mwĩai Ngai, na athũkũmi ma Ngai waitũ. Mũkaya ũthwii wa nthĩ ingĩ, na mũkeekathĩĩaa nũndũ ũthwii woo nũtw'ĩkĩte wenyu.

Mwĩai Ngai easya atĩĩ, “Nyie Mwĩai Ngai nĩnendete sila wa katĩ, nĩnĩmenete ũng'ei na ũthũku. Ngatuva andũ makwa kwa ũĩkĩĩku, na kũseũvya namo ũtianĩo ũtakathela.