Popular Bible Verses from Ĩsa 43

Share

Syaĩĩsyai yu nũndũ nĩngwĩka ũndũ mweũ; nũendee kwĩkĩka. Nĩmũkũlya, nũndũ mũtekũũmanya? Ngaseũvya nzĩa weũnĩ, na kwĩkĩa mbũsĩ nthĩ nyũmũ.

Yĩla wesĩla kĩw'ũnĩ kingĩ, ngeethĩawa vamwe naku, na yĩla wesĩla mbũsĩnĩ, iikakũkuaa. Yĩla wesĩla mwakinĩ, ndũkavĩsaa; mũĩ sya mwaki iikakũvĩvya.

“Mũikalilikane maũndũ ala mavĩtũku, o na mũikasũanĩe maũndũ ala ma tene.

Mwĩai Ngai ũla wakũmbie we Yakovo, ũla wakũmbie we Ĩsilaeli easya atĩĩ, “Ndũkakĩe, nũndũ nyie nĩnĩkwovoetye; nĩnĩkwĩtĩte na ĩsyĩtwa yaku; wĩ wakwa.

Nũndũ kwakwa wĩ wa vata na wa kũtaĩwa, na nũndũ nĩngwendete, nĩngũnengane andũ angĩ nũndũ waku, na kũnengane andũ ma mbaĩ ingĩ kwondũ wa thayũ waku.

Nĩkwĩthĩwa ninyie Mwĩai Ngai, Ngai waku, Ũla Mũtheu wa Ĩsilaeli, Mũtangĩĩi waku. Nĩngũnengane nthĩ ya Misili, ya Ethiovia na ya Seva, nĩ kana ũthaw'e.

Ndũkakĩe nũndũ nĩ vamwe naku; ngaete syana syaku kuma ngalĩko ya wumĩlonĩ wa syũa, na kũmũmbany'a kuma ngalĩko ya ũthũĩlonĩ wa syũa.

“Nyie ninyie Ngai ũla ũvetangaa mothũku menyu, kwondũ wa ndaĩa yakwa mwene, na ndililikanaa naĩ syenyu ĩngĩ.

Mwĩai Ngai easya atĩĩ, “Inyw'ĩ andũ ma Ĩsilaeli mwĩ ngũsĩ syakwa, na mwĩ athũkũmi makwa ala nĩnyuvĩte, nĩ kana mũmanye, na mũindĩkĩĩa, na mũimanya kana ninyie Ngai nĩ nyioka. Vai ngai ĩngĩ yaaĩthĩwa kw'o ate o nyie, na vai ngai ĩkethĩwa kw'o ĩtina wakw'a.

Nyie ninyie Mwĩai Ngai, na vai mũtangĩĩi ũngĩ ate o nyie.

Ninyie Ngai na ngaendeeaa kwĩthĩwa neo inyie we! Vai mũndũ ũtonya kũvonokya ũngĩ kuma ũtonyinĩ wakwa. Nĩkũlya, yĩla neeka ũndũ, ve mũndũ ũtonya kũũalyũla?”

Nyamũ sya kĩthekanĩ ikanenga ndaĩa; mbĩwa, na nyaa ikandaĩa, nũndũ nĩnĩetae kĩw'ũ weũnĩ, na mbũsĩ nthĩ nyũmũ, nĩnenge andũ makwa anyuve kĩw'ũ, andũ ala noombie nĩ kana matavany'e ũkumyo wakwa, nĩ kana makandaĩaa.”

“Ngeea ngalĩko ya ĩũlũ, ‘Malekyei mathi!’ Na kwĩa ngalĩko ya ĩtheo, ‘Mũikamasiĩĩe.’ Etei ana makwa kuma kũasa, na eĩtu makwa kuma kũla nthĩ ĩthelele, andũ onthe ala metanĩaw'a na ĩsyĩtwa yakwa, ala noombie kwondũ wa ũkumyo wakwa, ala noombie na namatw'ĩkĩthya.”

Mwĩai Ngai, ũla waseũvisye nzĩa kwĩsĩla ũkanganĩ, nzĩa kwĩsĩla kĩw'ũnĩ kingĩ, ũla waetie makasya ma kaũ, mbalasi, asikalĩ ma kaũ na ngũmbaũ, syakoma nthĩ itakokĩla ĩngĩ, ite na vinya na iilyĩ ũtambi wa taa mũvosye easya atĩĩ

Ninyie Mwĩai Ngai, Ũla Mũtheu wenyu, Mũmbi wa andũ ma Ĩsilaeli, Mũsumbĩ wenyu.”