Popular Bible Verses from रोमियो 1

Share

हऊँ यीशु मसीह रिया खुशखबरिया रे बारे च गर्व कराँ, काँह्भई सै हरेक विश्वास करने औल़े जो छुटकारा देणे रे खातर परमेशरा री सामर्थ इ, फेरी चाये पैहले सै यहूदी ओ या फेरी अन्यजातियां रे लोक ओ।

काँह्भई खुशखबरी अहांजो ये दस्सां इ भई परमेशर कियां माहणुये जो अपणिया नज़राँ च धर्मी बणाँ; सै शुरु ते लेईने आखिर तक विश्वासा पर टिकिरा; तियां जे भई पवित्रशास्त्रा च लिखिरा, “धर्मी माहणु विश्वासा ते जिऊंदा रैहणा।”

काँह्भई परमेशरा री अनन्त सामर्थ कने स्वाभाव कोई बी देक्खी नीं सकदा। पर संसारा रिया सृष्टिया रे बगता तेई परमेशरे अपणे कम्मां रे जरिये ये साफ-साफ दस्सीरा। इस खातर लोकां ले कोई बहान्ना निआं।

जबकि सै परमेशरा जो जाणाँ ये, पर सै तिस्सो परमेशरा रे रुपा च आदर या धन्यवाद नीं देन्दे, बल्कि सै उट-पटांग सोचणे लगे, कने तिन्हांरे दमाग फिरी गरे।

काँह्भई तिन्हे परमेशरा रिया सच्चाईया जो छड्डिने झूट्ठा पर विश्वास कित्या कने परमेशरा री बणाईरी चिज़ां री अराधना कने सेवा कित्ती, पर सै दुनिया रे बनाणे औल़े जो भुल्ली गये, सै जे सदा प्रशंसा रे काबिल आ! आमीन।

परमेशरा रा गुस्सा स्वर्गा ते तिन्हां सारे अविश्वासी कने पापी लोकां रे ऊपर भड़कां सै जे सच्चाईया जो अपणिया बुराईया ने दबाई रखां ये।

इस खातर परमेशरे तिन्हांजो बुरी इच्छां रे बशा च करित्या; येत्थी तक भई तिन्हां रियें जनानें बी अपणा सिधा-साधा स्वाभाव छड्डिने बासना रा बुरा स्वाभाव अपणाईल्या। तियां इ मर्दें बी जनानां ने अपणा स्वाभाविक गलाणा छडित्या कने सै अप्पूँ चियें बासना रिया अग्गी च जल़णे लगे, कने मर्दें-मर्दा ने बेशर्म काम्म कित्या इसा बुराईया रिया वजह ने परमेशरे तिन्हांजो ठीक सजा दित्ति। कने काँह्भई तिन्हे परमेशरा जो पछयाणने ते मना करित्या, इस खातर परमेशरे तिन्हौं तिन्हांरे मूर्ख बचाराँ पर छड्डीत्या, कने सै येढ़े बुरे काम्म करने लगे सै जे तिन्हौं नीं करने चाहिन्दे थे।

हलाँकि तिन्हें अप्पूँजो समझदार हुणे रा दावा कित्या, पर सै मूर्ख बणिगे, कने तिन्हें तेजोमय कने अविनाशी परमेशरा री अराधना करने रे बजाय, तिन्हें नाश हुणे औल़े माहणुआं, चिड़ियां, पशुआं कने सर्पां साई मूर्तियां री अराधना कित्ती।