Popular Bible Verses from रोमियो 8

Share

ते अस ज़ानतम, कि ज़ैना लोक परमेशरे सेइं प्यार केरतन, परमेशर तैन केरे लेई सब गल्‍लां केरे ज़िरिये भलियाई पैदा केरते; मतलब तैन केरे लेई ज़ैना तैनी अपने मेर्ज़रे मुताबिक च़ुनोरेन।

किजोकि मीं पूरू याकीने, कि न मौत, न ज़िन्दगी, न स्वर्गदूत, न हुकूमतां, न ज़ै वक्त च़लोरोए, न एजनेबालो वक्त, न शक्ति, न उचार, न डुग्घार ते न कोई होरि सृष्टि, असन परमेशरेरे प्यारे करां ज़ै इश्शे प्रभु यीशु मसीह मांए अलग केरि सकेली।

एन्च़रे पवित्र आत्मा इश्शी मद्दत केरते ज़ैखन अस परमेशरे पुड़ भरोसो रखने मां कमज़ोर भोतम, किजोकि अस न ज़ानम, कि प्राथना केन्च़रे केरतन; पन पवित्र आत्मा एप्पू कर लेइतां ज़ै बयानेरे बेइरे, इश्शे लेई बिनती केरतीए।

ते अस एन गल्‍लां केरे बारे मां कुन ज़ोम? अगर परमेशर इश्शे पासे, ते इश्शे खलाफ कौन भोइ बटते?

एल्हेरेलेइ हुनी ज़ैना मसीह यीशु मां आन, तैन पुड़ सज़ाहरो हुक्म नईं।

अगर इश्शो मन इश्शे पापी स्भावेरे मुताबिक च़लते त अस मरमेले, पन अगर इश्शो मन आत्मारे मुताबिक च़लते त असन ज़िन्दगी ते शान्ति मैल्हेली।

पन ज़ैने असन सेइं प्यार कियोरोए, तैसेरे ज़िरिये असन पूरे तरीके सेइं एन सैरी बुरी गल्‍लां पुड़ ज़ीत हासिल आहे।

मीं पूरू याकीने, कि ज़ैना दुख अस झ़ैल्‍लने लगोरेम, तैस महिमारे सामने, ज़ै परमेशर असन देनेबालोए, किछ भी नईं।

कौन असन मसीहेरे प्यारे करां अलग केरि बटते? मुसीबत या तंगी, या ज़ुलम, या काल, या नगूपन, या खतरो, या तलवार? इन मरां कोई भी चीज़ असन मसीहेरे प्यारे करां अलग न केरि बटे।

ते परमेशर ज़ै मनां केरो ज़ान्ने बालोए ज़ानते, कि पवित्र आत्मा कुन लगोरो ज़ोने। किजोकि तै पवित्र लोकां केरे लेई परमेशरेरे मेर्ज़ी सेइं बिनती केरते।

किजोकि ज़ेत्रे परमेशरेरे आत्मारे च़लाने सेइं च़लतन तैन्ना परमेशरेरे बच्‍चेन।

किजोकि ज़ैना लोक पापी स्भावेरे मुताबिक ज़िन्दगी बीतातन, तैना पापेरे बारे मां सोचतन, पन ज़ैना लोक पवित्र आत्मारे मुताबिक ज़िन्दगी बीतातन, तैना आत्मिक गल्‍लां केरे बारे मां सोचतन।

परमेशरे अपनु मट्ठू भी अपने लेई न रख्खू, बल्के तैन इश्शे सेब्भी केरे लेई तैसेरे दुश्मना केरे हवाले कियूं, ते तै मसीह सेइं असन तैन सब किछ देलो ज़ेसेरो वाधो तैने असन सेइं कियोरोए।

पवित्र आत्मा एप्पू इश्शी आत्मा सेइं मिलतां गवाही देते, कि अस परमेशरेरे बच्‍चेम। किजोकि अस परमेशरेरे बच्‍चेम ते असां तैना बरकतां हासिल केरमेले ज़ैना परमेशर अपने लोकां केरे लेई रेखोरिन, ते मसीहेरे लेई भी ज़ैन परमेशरे रखोरूए, तैन भी अस मसीह सेइं साथी हासिल केरमेले; किजोकि अगर अस मसीहेरे ज़ेरे दुख झ़ैलमेले त अस भी मसीहे साथी महिमा हासिल केरमेले।

किजोकि पापी स्भावेरे मुताबिक च़लनू परमेशरे सेइं बैर रखनोए, किजोकि न त पापी सुभाव परमेशरेरे कानूनेरे अधीने, ते न कानूनेरे मुताबिक च़ेलि बटते।

किजोकि सैरी रच़नरी चीज़ां बड़े बे सबरी सेइं तैस वक्तेरो इंतज़ार केरने लेगोरिन, कि ज़ेइस परमेशरे इन बांदो केरनू तैसेरे सच़्च़े बच्‍चे कौन आन।

किजोकि अस ज़ानतम कि सारी सृष्टि मिलतां हुना तगर कर लातीए ते तकलीफी मां तड़फतीए, ज़ेन्च़रे दोज़ींती गल्हे बिशनेरी तकलीफ भोतीए।