Popular Bible Verses from यशायाह 60

Share

हे यरूशलेम उठ, चमकदार बन; किजोकि तेरी लौ एवरीए, ते यहोवारी लौ तीं पुड़ बांदी भोवरीए।

कौमां तेरी लौअरे पासे एज्जेली, ते राज़े तेरी चमकते लौअरे पासे एज्जेले।

हेर, धेरती पुड़ त आंधरू ते रियासतां-रियासतां केरे लोकन पुड़ बड़ू आंधरू भोवरूए; पन तीं पुड़ यहोवा बांदो भोल्हो ते तैसेरी लौ तीं पुड़ बांदी भोल्ही।

तैखन तुसन मरां ज़ै घट थियो तै भी अक हज़ार भोइ गालो, ते सेभन करां कमज़ोर भी अक ज़बरदस्त कौम बेनि गाली। अवं यहोवा आईं सही मौके पुड़ इन सब किछ जल्दी पूरू केरेलो।

फिरी दीसां दिहाड़ेरी लौ तीं न भोल्ही, ते न चैंदनरी चाँदनी तीं पुड़ चमकेली; पन यहोवा तेरे लेई हमेशारी लौ ते तेरो परमेशर तेरी शोभा ठहरेलो।

फिरी तेरो दिहाड़ो कधी न डुबेलो ते न चैंदनरी लौ घट भोल्ही; किजोकि यहोवा तेरो हमेशारो लौ देनेबालो भोल्हो ते तेरे मातम केरनेरे दिहाड़े खतम भोइ गाले।

तैखन तू इस लाहेली ते तुत्तर चमकेलू, ते तेरो दिल खुशी सेइं धड़कने लग्गेलो ते खुशरी कोई हद न राहेली; किजोकि समुन्दरेरी सारी दौलत ते कौमां केरो माल तीं मैल्हेलो।

एपनी एछ़्छ़ी च़ेवरे पासन घेड़तां तक; तैना सब अकोट्ठे भोइतां तीं कां एज्जी राहोरेन; तेरां मट्ठां दूरेरां एज्जी राहोरेन, ते तेरी कुइयां कुम्मे मां एन्ही राहोरेन।

तेरे सारे लोक धर्मी भोल्हे; तैना हमेशा मुल्खेरे अधिकारी भोल्हे, तैना मेरे लेवरे बुट ते मेरे हथ्थां केरां कम्मां भोल्हां, ज़ैस सेइं मेरी महिमा बांदी भोल्ही।

तेरे मुल्खे मां फिरी कधे ज़ुलम न भोल्हो, ते न तेरी सरहद्दी अन्तर कोई तुबाही या अंधेर न भोल्ही; बल्के तू एपनी दिवारां केरू नवं छुटकारो ते अपने फाटकां केरू नवं तारीफ़ रखेली।

तेरे फाटक हमेशा खुल्‍ले राले; रात दिहैड़ी तैना बन्द न भोल्हे ज़ैस सेइं कौमां-कौमां केरि दौलत ते जाईदात ते तैन केरे राज़े गुलाम बनेइतां तीं कां पुज़ाए गाले।

तेरे मुल्खे मां ऊँटां केरां झुण्डां ते मिद्यान ते एपा मुल्खां केरि सेंढनी अकोट्ठी भोल्ही; शेबा मुल्खेरे सारे लोक एइतां सोन्नू ते लोबान तोफे आनेले ते यहोवारी तारीफ़ खुशी सेइं शुनाले।

यहोवा यरूशलेमे सेइं ज़ोते, परदेशी लोक तेरी शहरपनाहां दुबारां खेड़ि केरेले, ते तैन केरे राज़े तेरी सेवा केरेले; किजोकि मीं क्रोधे मां एइतां तीं दुख दित्तोरो थियो, पन हुनी खुशी भोइतां तीं पुड़ दया कियोरीए।

तू ज़ै शारोरी थी ते तीं सेइं नफरत केरते थिये, एड़ी तगर कि तीं मांमेइं कोई निस्तो भी न थियो; एल्हेरेलेइ अवं तीं हमेशारे लेई घमण्ड ते पीढ़ी-पीढ़ी खुशरी वजा बनेइलो।

कौमी-कौमरे लोक ते तैन केरे राज़े खुशी सेइं अपनि धन-दौलत तीं कां आनेले, ते तू बुझ़ेली कि अवं यहोवा तेरो छुटानेबालो याकूबेरो सर्वशक्तिमान आईं।