Popular Bible Verses from Roma 3

Share

Pakasa en tou iméma'o ing kamesé-meséaan, akar séra ra'ica makéré im bagéan a rarayo wo in sisiri' i Amang Kasuruan. Taan ampa'paano in upus aitambér i Amang Kasuruan sé tou anggapen-Na wutul an dior-Na ampa'paan eng kamesé-meséaan éra tinu'buso i Kristus Yesus.

sapaoka sé tou ro'na nianggap wutul i Amang Kasuruan, ampa'paan maéman a si Yesus Kristus. Niéma' i Amang Kasuruan in taniitu torona im pakasa é tou maéman a si Yesus Kristus. Ampa'paan pakasa en tou puté waya an dior i Amang Kasuruan.

Sia ayutuso mai i Amang Kasuruan ang kayo'baan wosama' makéré ukuman; maté wo en enda'-Na makatiti-titis. Niéma'-Na in taniitu wosama' em papaté i Yesus itu méma' sé tou ro'na icawekar ang kamesé-meséaan sa séra maéman ai Sia wo séra nianggap wutul i Amang Kasuruan. Si Amang Kasuruan méma' in taniitu en tumuru' sapaoka Sia ra'ica marapit. Ampa'paan indior Sia talesen makaséré sé tou mengéma-ngéma' ing kamesé-meséaan akar séra ra'ica ukumen-Na. Si Yesus maté en sumawel icita ampa'paan ing kamesé-meséaan, siitu en tuusna sapaoka si Amang Kasuruan ra'ica marapit. Wo in taniitu aituru'-Nao sapaoka Sia wutul; wo pakasa é tou maéman a si Yesus, nianggap i Amang Kasuruan wutul an dior-Na.

Ampa'paan ra'ica wana tou mandé esake' sé nianggap wutul an dior i Amang Kasuruan ampa'paan mengaéma' in ukum Torat. Taan, ampa'paano taré in ukum Torat ituo sé tou makailek ing kamesé-meséaan.

Tanu in aipatic ang Kitap Le'nas tana'i, “Ra'ica wana tou e nianggap wutul, mandé esake'. Ra'ica wana tou e makailek si wutul, wo ra'ica wana tou e masalé' makatuus si Amang Kasuruan, mandé esake'. Pakasa en tou itumayango asi Amang Kasuruan; séra im baya ra'ica wana torona. Ra'ica wana si méngaéma' in loor, mandé esake' tou, ra'ica wana!

Anaé tana'i: Sé tou nianggap wutul i Amang Kasuruan ampa'paan séra maéman a si Yesus, ra'ica ampa'paan mengaéma' in ukum Torat.

Tantu émaan-Na! Ampa'paan si Amang Kasuruan itu wutul, wo pakasa en tou kotowo. Tanu en aipatic ang Kitap Le'nas andumoro' i Amang Kasuruan in tana'i, “Pakasa sé aicua-Mu wutul. An tutuw Ko in akimen, tantu Ico muntung.”