Popular Bible Verses from EVASELIO A MATEO 16

Share

Nee ui leva e Sesu ki ana tisipulo: Ko ia ae e fia muli mai ia au, ke fakafisi ia ia kia ia totonu, ke ina amo tona koluse, pea ke muli mai ia ia ia au.

Pea ko au, e au ui atu kia koe, ko koe ko Petelo (petros, he foi maka), pea i te utu (petra, te foi utu) aia e au fakatuu anai toku Ekelesia, pea ko te u matapa o te nofoaga o te kau mate e mole natou malo anai ia ia.

E au tuku anai kia koe te u kalavi o te puleaga o te atu lagi: Ko te mea ae e ke hai anai i te kele e hai anai i te atu lagi, pea ko te mea ae e ke veteki anai i te kele e veteki anai i te atu lagi.

Koteuhi ko ia ae e ina fia haofaki tona mauli e ina pulihi anai ia ia, kae ko ia ae e ina pulihi anai tona mauli o tupu ko au e ina toe mau anai ia ia.

Pe kotea tona aoga ki he tagata tana mau te malamanei katoa, kae e pulinoa tona laumalie? Pe kotea e foaki anai e he tagata ke totogi ai tona laumalie?

Pea nee ina ui leva kia natou, ko koutou, pe e kotou ui ko ai au? Nee tali leva e Simone Petelo: Ko koe ko te Kilisito, ko te Alo o te Atua mauli.

Pea nee folafola leva ia Sesu, o ui kia ia: E ke manuia Simone, foha o Sonasi; koteuhi e mole ko te kakano mo te toto ae nee na fakaha atu kia koe te mea aia, kae ko taku Tamai ae e nofo i te atu lagi.