Popular Bible Verses from Romanfoɛ 1

Share

Na nzɛmba ne nwo nyɛ me nya, ofikyɛ ɔte Nyameɛ tumi bɔ ɔkɔ ngoalelɛ nu ma bɛ bɔ bede bedi amukoraa, Yudafoɛ yeɛ beli moa ɔ, yeɛ Amaenmaensofoɛ koso bɛtoa berɛ ɔ.

Ofikyɛ nzɛmba ne kyire kyɛ, Nyameɛ siesie kuro sona ne ye afia maa bɛyɛ ko: na ɛhe gyi gyidie ngome so. Kyɛbɔ bahyerɛ kyɛ, “Teneneeniɛ de, ɔnate ye gyidie so yeɛ okonya ngoa ɔ.”

Ofi mmerɛ bɔ Nyameɛ bɔle wiase ɔ, ye tumi afebɔɔ ne ɔne ye Nyameɛ sue te nikyee bɔ yɛmva yɛ nye nnwu ye ɔ, nakoso waye bɛ ali wahyire yɛ wɔ ye abɔdeɛ nu, yiti belle nyeanoɛ biala.

Né bɛse Nyameɛ de, nakoso banhyɛ ye animnyam kyɛ Nyameɛ, banna ye ase, na mmom b’adwene yɛle ngwaseaa adwene, na bɛ ti anu adwene yɛle awosii.

Ofikyɛ nahorɛ bɔ ɔfa Nyameɛ nwo ne bɛfa bɛsesane ngondombo. Bɛsɔnene na bɛsole abɔdeɛ, na bɛyakyili Ɛdangama Nyameɛ bɔ saleɛ te ye deɛ afebɔɔ ne! Amen.

Na bɛda Nyameɛ ahonehulɛ ne ali befi nyameɛso bɛfa betia mmenia bɔ benzuro Nyameɛ ná bɛ yɔleɛ ndengyɛ, bɔ bɛfa b’amumuyɛɛ so besi nahorɛ ne nwo atee ɔ.

Ɔnate sɔ ati, Nyameɛ pole b’animguaseɛ akɔnnɔ bra ne mane bɛ. Bɛ mmrasua mɔ ne bɛ mmango mmrasua bɛlelale bɔ otia abɔdeɛ nu nhyehyɛleɛ ɔ. Sɔ ala yeɛ mmienzua yakyili kyɛ bɛ ne mmrasua kɔla ɔ, na bɛsosɔle kyɛ kyea bɛmane bɛ nwo. Mmienzua ne mmienzua beguaguale bɛ nwo fiɛ, na bɛ sa hane bɛ bɔne ne nwo akatuaa bɔ ɔfata ɔ. Bɛpole kyɛ bekonwu Nyameɛ nwo nimdeɛ, yiti Nyameɛ pole bɛ bɔbɔ b’adwene fiɛ ne mane bɛ, maa bɛyɔle nningyein bɔ ɔmvata ɔ.

Bɛdwenene kyɛ bɛse nworɛ, nakoso bɛte ngwaseafoɛ. Bɛfale Nyameɛ bɔ onwu ɔ n’animnyam bɛsesane honi mɔ bɔ bɛte kyɛ kuro sona bɔ owu ɔ, ɔne nnomaa ne ndɔteboa ne ngaka bɔ bɛtwe bɛ nwo ase ɔ.