Popular Bible Verses from रोम सहरतोर 8

Share

देवुळि मुनेन विचर कीस तासतपु, बोन-बोन केयता, ओरे तान जीवा कीस्तोर. ओरिह्‌क बेवे आयिङ, देवुळि अव सबेटविना मेटे, ओरेनाह्‌क बेसताङे पोल्‍लोन पुटिह कीसीस्ता इनजोर, माट पुतल.

मावा सामि येसु किर्स्तुन मयेनाह्‌क डोललाह लोहचि, माक इचोन जीवा कीता इनजोर, देवुळि तोहता. हामुर आयि, पिसमुळ आयि, पोग़ोटाङ देवतुल्क आयिङ, देयह्‌क-बूतह्‌क आयिङ, नेटा रेयि आयि, नाळता आल्सुळ आयि, पेन्क-हानास्क आयिङ, पोग़ोटा बूमतगा ओसो इळ्ता बूमतगा देवुळि पुटिह कीतव बेवे आयिङ, मयगा मनदनद देवुळता गूनमताहि, माक बेवे एग़िह कीया पग़वोङ इनजोर, नना बेस-नेह्‌ना पुतन.

अचोने आयो मति, माक तेळियवाह्‌कु, देवुळता जीवा माक तोळ मन्ह्‌ता. पार्तना कीयनस्के, देवुळतुन माट बाताल ताल्ह्‌कना, बेद्रम ताल्ह्‌कना इन्जि पुनवल. मावा तोडटाहि, माट देवुळतुन पोल्‍लोङ वळ्ह्‌क पुनवल, मति ताना जीवा मावा लोप्पाडाहि ऊल्गसोर केयिह्‌ता. केयिसि, मावा पार्तनातुन देवुळतगा बराबर एव्सिह कीसीस्ता.

इचानाह वेहचोर वातन, अव सबे पोल्‍लोन ऊळिसि, इंजेके उंदिय पोल्‍लो पेसिह्‌ता: देवुळि मावा तोळ मतेके, मावा विरुदतोर बेच्वुर मतेकाय, माक बाताले आयो!

(मुने नाक पापम ताकिह कीसि, अमेसाता हामुरतेके ओसींदु.) मति इंजेके नना येसु किर्स्तुन विस्वस कीताह्‌कु, नयगा मनदनद देवुळता जीवा पापमता, हामुरता कयदग्डाहि नाक विळ्सिह कीता. अदे जीवा इंजेके नाक ताकिह कीस्ता. (अदिनेनाह्‌क देवुळि कसुरतोरिर इन्जि, मावा नेयम कीयग़ा इनजोर, माक बातय रेय इले.) येसु किर्स्तुन विस्वस केवालोरिह्‌क, [मन्कना बुदते ताकवा, देवुळता जीवा वेहतप ताकवालोरिह्‌क,] देवुळि बेस्केन सिक्सा एवो.

मन्कना बुदि मीवाङ विचर्किन ताकिह कीतेके, मीक देवुळ ईयनद पिसमुळ दोर्को आयग़ा. मति देवुळता जीवा मीवाङ विचर्किन ताकिह कीतेक बार, मीट देवुळता संगे पिसकिर, ओसो सुकमते मनदकिर.

इव तिपल्क माक वातेक तेला, माक जीवा कीतोग़ु किर्स्तु मावा तोळ मनाह्‌कु, माक आरे कीया पग़वोङ, माटे पूरा गेल्सिह्‌नल.

किर्स्तुनेनाह्‌क विस्वसिरिह्‌क इंजेक तिपल वास्ताये. मति वायनद कालमते, देवुळि तना डीसा तोहचि, बेचोन माक मान ईयग़ा, ताना सीता कीतेके, मावा इंजेटा तिपल ओसोय अल्को मन्ह्‌ता इन्जि, नना पुह्‌नन.

मुनेन दाविद राजाल सास्त्रमतगा इद्रम रासतोग़: ए देवुळि! माट नीवा मन्कलोरोम इनजोर, लोकुर माक जर्मिने हव्कलाह ऊळिह्‌तोर. एर्रेन अस्कलाह ओतप लेह्‌का, माक ओयलाह ऊळिह्‌तोर. इनजोर रासतोग़. माक तिपल वावालि, लोकुरा विरुद वावालि, दुकळ आवालि, गेंदेङ दोर्कोङ आवेस्कु, दोकाता जागातगा मनेलल, लोकुर माक कसेह्‌क-मग़्स्कने हव्केर. इद्रमताङ तिपल्क वातेके, किर्स्तु माक जीवा केवोग़ इनजोर इनदकला? (आयो! ओग़ माक जीवा कीसोरेन मन्ह्‌तोग़.)

देवुळता विचर मतपे, पवित्र जीवा देवुळता लोकुरेनाह्‌क अर्ज कीस्ता. अदिनेनाह्‌क मावाङ पोटालोप्पाडाङ पोल्‍लोन पुनदनद देवुळि, तना जीवाताङ विचर्किन पुन्ह्‌ता.

बाराह्‌क इतेके, बोर मन्कलोरिन देवुळता जीवा ताकिह कीस्ता, ओरे देवुळताङ मग़्क-मयास्‍क मन्ह्‌तोर.

मन्कना बुदते ताकवालोर बार, मन्कनाङे पोल्‍लोनगा सीता कीसोर मन्ह्‌तोर. मति देवुळता जीवा वेहतप ताकवालोर बार, देवुळताङ पोल्‍लोनगा सीता कीसोर मन्ह्‌तोर.

देवुळि किर्स्तुन मयेनाह्‌क डोललाह वने विळ्सिसीता, वेग़ नावा वग़ोग़े मग़ि इनजोर, विचर वने केवो, अचोन ताना गूनमि! इतेके तना करल कीस मतपु, इव सबेटविन चिव्टम आयवा, माक निटमे ईयग़ा.

इंगो, देवुळता जीवा मावा जीवातुन, मीट निटमे देवुळताङ मग़्क-मयस्कनिर इनजोर, साक्सि ईयलाह आता. इद्रमि किर्स्तुना लेह्‌का, माट वने देवुळताङ मग़्क-मयास्कनल आंदल, अहे ओना लेह्‌का माक वने देवुळबाबाल तनाङ मग़्क-मयास्किह्‌क तासतद बर्कत दोर्कग़ा. माट इद बूमते किर्स्तुना संगे तिपल आय्ह्‌नल इतेके, पया देवुळदीपते ओना संगे, देवुळताहि मान वने दोर्किह कीकल.

बह इतेके मन्कना बुदते विचर केवालोर देवुळताङ अडोन केंजोर, केंज पग़वोर वने. अदिनेनाह्‌क अद्रम विचर केवालोर, देवुळता विरुद मन्ह्‌तोर.

(आदम-अवाल बेस्के पापम कीतोर अस्के,) देवुळि ओरिन सरप ईता, ओसो पूरा बूमतगा पीळा अर्हता.(मन्कलोरिह्‌क इतेके, ओरा कसुरतेनाह्‌क सरप दल्गता, मति) देवुळ पुटिह कीतव सबेटविस्किह्‌क बार, कसुर केवाये पीळा दोर्कता. मति अविस्किह्‌क वने आसा मन्ह्‌ता. उंद दिया देवुळि तनाङ मग़्क-मयास्किन, अद सरपताहि विळ्सिह कीसि, ओरिह्‌क मान ईयग़ा, अद मान पोळ्क्ने दिसग़ा. अदे दिया, देवुळि तना पुटिह कीतव सबेटविन वने, अविस्कना पीळाताहि विळ्सिह कीयग़ा. अद दियातुन अवु अग़ ऊळसोरेन मन्ह्‌ताङ.

आंचाळि रिकम आयह्‌पा, नोयनद तेदतस्के बेद्रम ऊल्गिह्‌ता, अद्रमे अव सबेटव इंजेक एवनाह, ऊल्गतप आंदुङ इनजोर पुतल.