Popular Bible Verses from Efesios 2

Share

Tumen Ku máax beeto'on; tu beetajo'on ti' Cristo Jesús u ti'al ca c beet ma'alob meyajo'ob, je'el bix u yáax nu'uctmaj leti'o' u ti'al ca c dzo'ocbese.

Tumen tu yo'olal u siibal Kue' te'exe' dzo'oc a to'ocole'ex, tu yo'olal le ocsaj óolalo'. Lela' ma' jun p'éel ba'al ta beetaje'ex te'exi', ba'ale' jun p'éel ba'al j dza'ab ti' te'ex tumen Ku. Ma' tu yo'olal wa ba'ax ca u beet máaqui', beyo' mix máac cu páajtal u ca'analtal u yich.

Ba'ale' Kue' jach nojoch u ch'a'a óotzilil, yéetel tu jach yaabilto'one' ca tu dzaj to'on cuxtal jun múuch' yéetel Cristo, quex láili' quimeno'on ca'ach yéetel c kebano'obe'. Bey túuno', tu yo'olal u siibal utzil Kue' te'exe' toca'ane'ex.

Kue' tu ca'a púut cuxquinto'on xan jun múuch' yéetel Cristo Jesús ca tu beetaj c cutal tu yéetel ti' ca'anil cúuchilo'ob.

Tu yo'olal lela' te'exe' ma' táanxel lu'umile'exi' ti' jun p'éel lu'um ma' a ti'ale'exi', ba'ale' éet caajile'ex yéetel tuláacal le máaxo'ob u ti'alo'ob Kuo'. Te'exe' beye'ex jun p'éel pakil naje'; dza'ane'ex tu yóokol le chuun pak dzaab tumen le apóstolo'ob yéetel le aj bóobato'obo', yéetel Jesucristoe' leti' u noj tuunichil le chuun pako'.