Popular Bible Verses from Olaawo 2

Share

Nluku noosiila osisimira waya opule khufikhiri wahati aarettaniyeeyo Eburahiima, Esiyaakha na Yaakhumpa. Nluku khuwoona meezirayiilu khumweeleya tafwawuthi aariinaazo.

Ziviriyeevo siikhu zawaatta khufwa mfwalume wa Misuri. Atthu a Ezirayiilu khusala asisimira na okhuwa monkoni wa oviitthwaana, nkhuwo aya opule khunfiyela Nluku.

Paata ya mwaana otule owula khuntiisela mwaana wa Firawuuna khunretta wiiya mwanawe. Khuntthaja nzina la Munsa, araka: “Maana koolaza mmaati.”

Aphano, mwaana wa Firawuuna khumuuza yoori: “Onthuule mwaana otu omwaamwise zwaamu yaka, kintta wuuripha phakari yawo.” Nunu otule khunthuula mwaana khusala amwaamwisa.

Mwaana wankha wa Firawuuna khwiishukhela mmuttho olawa woowa, ajaazi awe aarina khusala avira nkhome wa muuttho, ye khoona khelenke etile eri ntteketthe khunruma njaazi awe khweettela.

Siikhu moote, wakathi Munsa apatthiyeevo omwinyi, khulankha khulawa wa attwiize meepereewu khoona khaazi yoolipa aari okholisiwaaye. Theenya khumoona mmisuri aari ompiyaaye na onvulalisa mwiipereewu. Khweekesa okhuno na okhuno nawoona yoori khaari otawo hatha ntthu, khumuula mmisuri otule khunsirela vanshaka.