Popular Bible Verses from PROVERBIOS 3

Share

Mandaj Diostaca, cambaj tucui shunguhuan yariangui. Aligutapacha yarishpami purini yashpaca, ama jariyanguichu. Imata rurangapajpash, Diostara yaringui. Paimi, can purina ñangunapipash aliguta pushanga.

Ama canllata alipacha yachajushcami cani yanguichu. Ashtahuangarin Mandaj Diosta manllashpa, tucui nalimandapash anchuringui.

Can charishca imalla alicunata carashpa, Mandaj Diosta alicachingui. Punda fucushca tucui granocunatapash cushpa alicachingui. Shina rurajpimi, granocunata alichina ucucunapipash ninanda jundachinga. Uvasta cutana pushtucunapipashmi, llullu vino jundashpami talirijunga.

Pitapash llaquinata, na llullashpa causanataca, ima horallapash ama saquinguichu. Chaitaca, cungapi huatarishcashna, shungupi escribishcashna charingui.

Ñuca huahualla, Mandaj Dios llaquichijpica, ama yangapi churanguichu. Ali tucuchun llaquichijpipash, ama fiñaringuichu. Churita juyashpa taita llaquichinshnallatami, Mandaj Diospash pai juyashcacunata llaquichin.

Ñuca huahualla, ñuca mandashca shimicunataca ama cunganguichu. Ñuca mandashcacunataca, cambaj shungupi alichingui. Shina rurashpami, unai punllacunata, unai huatacunata causangui. Shinallata casilla ali causaitapashmi, ashtahuan charingui.

Cai ali yachaita tarishpa, ali yuyaita charij runaca ninandami cushijun. Cai ali yachaica, culquita tarishcatapash yali alimi. Cai ali yachaimanda japinaca, ashtahuan ali orotapash yali alimi. Juyailla ninan valishca rumicunatapash ashtahuan yali ninan valishcami. Cai ali yachaihuanga, tucui ima munashcahuambash na chimbapuranallami.

Maijanman cashpapash ayudanapacha cajpi, ayudai ushashpaca, ama na ninguichu.

Mandaj Diosca, ali yachaihuanmi, cai pachataca rurarca. Ali yuyaihuanmi, jahua pachatapash shinllitapacha churarca.