Popular Bible Verses from HEBREOS 11

Share

Iyawniyuq kayqa, imatachus “jap'iqasaqmi” nispa tukuy sunquwan suyachkanchis chaymi. Imachus kachkan chayta amapas rikuchkasun chaypaq kasqanmanta allinta yachanam. Iyawniyuq kasqankuraykum Diosqa ñawpaq machulanchiskunata jap'iqarqan.

Chaywampas, manachus iyawniyuq kachuwan chhikaqa manam imaynamantapas Diospaq sunqunman chayachkaqta kawsakuyta atichkachuwanchu, imaraykuchus Diosman qayllachakunapaqqa paypaq kasqantam ujqa iyaw ninan, jinataq pikunachus payman maskanku chaykunaman sumaq kayninta qusqantapas iyaw ninallantaqmi.

Iyaw nisqanchisraykum nuqanchisqa Diospaq kaypachata rimayninwan ruwasqanmanta yachanchisqa, imaraykuchus kunampachapi imakunatachus rikuchkanchis chaykunaqa, imakunachus mana rikukuyta atikuchkarqan chaykunamanta ruwasqam karqan.

Iyawniyraykum jayk'aqchus Diosqa Abraham runaman wajarqan chhikaqa uyart'arqan, jinaspataq may chhikaman purisqanta mana yachaspam ima jallp'atachus Diosqa qunapaq nichkasqa chayman puripunapaq lluqsimpurqan. Iyawniyraykullataqmi ima jallp'atachus Diosqa qunapaq rimayninta quchkasqa chayniq jallp'api puriq runajina kawsakurqan. Payqa awasqakunamanta ruwasqa ch'ujllakunapim tiyakurqan, imaynatachus Isaac jinataq Jacob runakunapas kawsakullarqankutaq ajinata, pikunachus chay Diospaq rimaynin qusqantaqa jap'iqallarqankutaqmi.

Iyawniyraykum, Noé runaqa Diosman uyart'arqan jinataq wasimasinkuna qhispichinapaq athun yamputapas ruwallarqantaq, jayk'aqchus Diosqa imaymana manaraq rikukuq ruwaykuna ruwakunanmanta willachkarqan chhikaqa. Chay iyawniyraykullataqmi Noé runaqa kaypacha runakunaman juchanchaykurqan, jinaspataq iyawniyniqtam imachus chiqankaq kachkan chay jap'iqaq runaman tukupurqan.

Iyawniyninraykum Henoc runaqa mana wañunampaq kawsachkaq uqharisqa karqan, imaraykuchus Diosmi apakupusqa. Manaraq uqharisqa kachkarqan chhikaqa, Henoc runaqa Diospaq sunqunman chayachkaqtam kawsakurqan nispam Qilqasqakunapi nin.

Iyawniyraykum Abel runaqa Caín wawqinmanta niqtimpas astawan allinkaq jaywayta Diosman jaywarqan, chayraykum Diosqa payman chiqan runamanta riqsipurqan jinaspataq jaywasqankunatapas sumaqta jap'iqarqan. Ajinaqa Abel runa wañupun chhikapas, iyaw nisqanniqtam rimapayakuchkallawanchis.

Iyawniyraykullataqmi Sara warminqa mana wachakuq karqan jinataq Abrahamqa ancha machu runaña kapurqan chhikapas, payqa tata kanapaq kallpata jap'iqarqan, imaraykuchus Diospaq uj churi qunampaq rimaynin qusqampiqa mana iskayakuspam payqa iyaw nirqan.

Imaraykuchus Abraham runaqa maykaq llaqtatachus Diosqa ruwanapaq wakichachkarqan jinataq ruwachkarqan chay sumaq tiyaykuchisqa llaqtatam suyachkarqan.

Iyawniyraykullataqmi jayk'aqchus Moisesqa machu runaña kapurqan chhikaqa, Faraonpaq ususimpaq churin nichikuyta mana munarqanchu; manachayqa jucha chawpipi kusukuywan kawsakunamanta niqtimpas Diospaq llaqtanwan kuska chhiqnisqa kaytam munarqan. Egipto llaqtapi kaq qhapaq kaqkunajawapi kawsanamanta niqtimpas, imaynatachus Mesías ñak'arinan kachkarqan chay kikin ñak'arinakaqmi astawan allinqa nispam Moisesqa yuwarqan. Imaraykuchus payqa imatachus Diosqa qunan kachkarqan chaytaqa allintam yacharqan. Iyawniyraykum Moisesqa qhapaq suyu apaykachaqta mana mancharispa Egipto llaqtamanta puripurqan; manam jayk'aqpas iskayakurqanchu, jinaspataq mana rikuy atina Dios kikintapas rikuchkanman ajinatam puriykachakurqan.

Iyawniyraykum jayk'aqchus Diosqa Abraham runaman yanarichkarqan chhikaqa Isaac churinta jaywanapaq wakichakurqan. Diosqa rimayninta quchkarqan chhikapas, tukuy sunqum payqa uj sapa churinta jaywanapaq wakichakurqan, imaraykuchus Diosqa ajinata nispam rimayninta qusqa

Iyawniyraykullataqmi mana allin puriykachaq Rahab warmiqa imaynatachus mana uyart'akuqkuna wañurachkarqanku ajinata mana wañuchkarqanchu, imaraykuchus payqa Israel llaqtapaq kachasqan qhawaqaq runakunatam tukuy sunqunwan jap'iqarisqa.

Iyawniyraykum israelitakunaqa Puka Quchaniqta ch'aki pampapas kanman ajinata ujniqman chimpkatarqanku; chhikamantataq jayk'aqchus Egipto llaqtapi kaq runakuna kikin ruwayta munarqanku chhikataq, unu ukhuman jalaykuspam mikirakupurqanku.

Iyawniyraykum jayk'aqchus israelitakunaqa qanchis p'unchay junt'a Jericó llaqta muyuriyta muyurqanku chhikaqa, chay llaqtapaq muyuriy pirqankuna lluqllaykumpurqan.

Iyawniyraykum Moisesqa Pascua raymita ruwarqan, chayraykum punkukunata yawarwan ch'aqch'ukipamunankupaq kamachirqan, ajinamanta wañuchiq angelqa mayqin israelitakunapaq kurajkaq wawankunatapas ama wañurachinampaq.

Iyawniyraykum José runaqa wañunan qayllapiña kapurqan chhikaqa, israelitakunaqa Egipto llaqtamanta lluqsimpunqakum nispa nirqan, jinaspataq ayampaq tullunkunawan imatachus ruwananku kachkarqan chaymantapas kamachirqallantaq.

Iyawniyraykum jayk'aqchus Jacob runaqa wañunan qayllapiña kapurqan chhikaqa, José churimpaq sapa uj wawankunaman sumaq kayta qunapaq rimayninta qurqan, jinaspataq thujrumpi qimirikuspam Diosman yupaycharqan.

Iyawniyraykum Isaac runaqa Jacob jinataq Esaú churinkunaman jamuq p'unchaykunapi sumaq kayta qunapaq rimayninta qurqan.