Popular Bible Verses from Isajos 61

Share

Ráskire-Devléskiro Dúho (Fáno) isyn pe Mánde, pal-dová so Raj Devél pomakhcia Man te phenáv bahtaló lav (bahtalý zan) čororenge; bičhadiá Man, sob (kaj) te sastiakirav manušén rozmarde ilésa, te phenáv pal vólia odolénge, kon isyn dre navolia (bešyben); te phenáv manušénge dre bešyben, so vudará bešybnytka isyn psirade (otkerde). Sob (kaj) te phenáv pal lačhó berš Ráskire-Devléskiro, pal dyvés, kóli pherdjola xolý amaré Devléskiri, te podrikirav sarén, dre konéste isyn túga (tuginela). Te phenáv odolénge, kon isyn bibahtaló pe Sióno, so práho zaparuvelape šukarone ukedyibnasa; roviben radymakire (lošalé) jeliejosa; pharó (smentno) dúho (fáno) zaparuvelape šukarone uribnasa i kharna len zoralé čačipnása, Ráskire-Devléskire butiasa dre Léskiro baripén.

Pal dová, so tumen ladžakirenas, tumé priléna dre duj móly butýr patýv; pal-dová, so košenas tumen, tumé javéna te radynénpe, so dasaví isyn léngiri vólia, pal-dová so duj móly tumé doreséna (dolena) pe péskiri phuv butýr; viéčno rádyma (loš) javéla lénde.

Radymása me láva te radynavpe pal Raste-Devléste; javéla te radynélpe zoralés miro dúho (fáno) pal miré Devléste, pal-dová so Jov uridia man dre ídi zrakhibnytka, uridia man čačipnaskire uribnasa; syr pe terneste Jov čhudiá viánka, syr ternia ukedyja.

I jone javéna te ĥazdén phuvjá, savé ĥará isyn čhučé; ĥazdéna ĥaratuné rosphagirdé kherá i občorde fórja, savé ĥaratuné dyveséndyr sys čhučé.

I syr phuv barjakirel péske čarjá, syr únta (sado) barjakiréla dová, so dre lákiri phuv čhudé, adiáke i Raj Devél sykavéla čačipén i patýv angíl saré narody.

A tumé javéna te kharenpe Ráskire-Devléskire rašanca, tumen kharna amaré Ráskire-Devléskire dynar'jénca; tumé javéna te len kófo barvalé narodengire barvalypnastyr, tumé javéna šarde léngire baripnasa.

Pal-dová so Me, Raj Devél, davá patýv čačuné sendoske, Me na kamám, kóli čorena, kóli pritasavéna; Me otdáva pale lénge pir čačipén; Me čhuváva lénca viéčno zavieto.