Popular Bible Verses from Markus 13

Share

La nakaba'ci kamu' buda tau, nasaba' mikatappa'ina'. Na la jaji susi joo, tomassile'to mpangpebunoan sile'tona. Susi too ambe' lako anakkana. Anak nnewa tomatuanna, napangpebunoanni. Apa ia to tomatappa' tarruh ratu lako ssalainna lino, la dipasalama'.”

Iamo joo, majaga kamu', nasaba' te'da mikalannaii to karatuan-Ku'.

Ia ke dijokko kamu' ammidipangngolo lako to dinii rra'tah kara-kara, danggi' miselang kumua apara la mipau mebali. Nasaba' Roh Allataala la mpauan kamu' apa to la mipebalian joo wattu.

Ia to langi' sola lino la lanynya', apa ia to kadang-Ku' la tatta' te'da cappa'na.”

Nakuapa Puang Isa, “Te'da tau nnissenni to wattu karatuan-Ku', moi malaeka' jao suruga, moi tee Aku', Anak, Ambe' manda ia to nnissenni.

Ia ke ssa'ding kamu' oni kasirarian sola kareba kasirarian, danggi' mimalaja'. Nasaba' nang la jaji ngasanni joo, apa te'dapa nawattunna Kiama' lino.

Iamo joo majaga tarruh kamu'! Nasaba' te'da miissenni piran nalapole joo ampu bola, wa'ding karuen, tangnga bongi, dannari iarika ke tibangkahmi mariwang. Jaji moi nata'pa ratu, te'da sussana ke natimba'i joo kaunanna majaga tongan. Susi todamo kamu' la majaga tongan, nasaba' te'da miissenni kumua piranra kularatu. Ia tee apa kupauan kamu', kupauan ngasan toomo tau, kumua, ‘Majaga kamu'.’ ”

Ia to mesa' bangsa la sirari nnewa bangsa laen, ia to mesa' kaparentan rrarii kaparentan laenna. Umbo-umbo nanii la den nino sola karorian la'da'. Ia tuu lako, mane' pamulannari kamasussan susi pa'dikkina ke mane' mangnguriwa'i to baine la keanak.

La dipangpeissenan ia jolo' lako sininna bangsa to Kareba Kasalamatan namane' Kiama' lino.

Nasaba' buda tau la ratu mpusanga sangang-Ku' nakua, ‘Aku'mo Raja Mangpasalama'!’ na buda tau la napalao sala.

La majaga kamu', nasaba' la dijokko kamu', ammidipangngolo lako tomangra'tah kara-kara. La dirambi kamu' lan bola passambajangan. La dipangngolo kamu' lako tomangparenta sola raja, nasaba' mituru'na'. Iamo joo wattu la minii mpangpeissenanni to Kareba Kasalamatan lako tuu lako tau.

Nasaba' buda nabi tangtongan sola tossanga kalena tomangpasalama' la mpangpekitan kalena. La mpugauk mangrupa-rupa tanda mejangngaran sola panggaukan mekalajatan, la mpalao sala tau, na ke wa'dingngi moi too umma'-Na Puang Allataala.

Mpatarruhhi kadan-Na Puang Isa nakua, “Ianna mangkamo joo kamaparrisan, te'damo namangngarrang to allo sola bulan. La sipolloranni to bintuin jao mai langi' nalamausa' ngasan to tontoe kuasa jao langi'.