Popular Bible Verses from REVELATION 12

Share

“Jiosh si Kehsha at am i e dagito mat g ehꞌedaj e iagchul ab Jiosh wui. K g hemajkamgaj heg hekaj ab si hiwig ch s-ap ahgachug g wohokam ab amjed ch hab gehg g Jiawul, chum as hems wo e muhkid.

Ntki hahawa hema ep kah an dahm kahchim ch ed. Kuki id si s-kaidam hab kaij, “Neh, chum o hekid ab kehk g ge Jiawul Jiosh baꞌich ch ab chum haꞌichu ha abchud g Jiosh hemajkamga. T wabshaba g Jiosh gam hu i wuhshad k am i maskogi g si e-Kehsha gewkdag. Kut hab wa masma i e maskogi g ha-doꞌibiadag g Jiosh hemajkamga.

Ihda Nehbig Hujud atki gam hu si e wua ab amjed g dahm kahchim. Heg oki wud mash wa koꞌoi masma ch hab chehgig ge Jiawul ch hab ep chehgig Satan. Id o ha iattogid g wehs hemajkam an jewed dahm. Ab amt i ha nehnich g piongaj wehmaj.

T wo si s-hehgigk wehsijj hegam mo am haꞌichug Jiosh kihdag ed. T wabshaba wo si e shoꞌigch hegam mo am haꞌichug jewed dahm. Jiawul at si s-bagam ab wo i hud jewed dahm s-mahchch mo pi shaꞌi tash hiwgidas.”

Tki an haha wabsh g cheggiadag hab e juh Jiosh kihdag ed. Hegai anghil mo hab chehgig Michael g e-anghiliga ha wehm oki cheggia g Nehbig Hujud. K wehs g jijawul am i wehmt g Nehbig Hujud. Tki wabshaba hegam Michael ha gehg. Kumtki hahawa pi ha hiwigi mas an ep wo haꞌichugk Jiosh kihdag ed.

Tki haha wabsh wohoꞌi bagat g Nehbig Hujud ab wui g uwi k amjed am i ha cheggia hegam mo ab d amjedkamaj. Uwi amjedkam oki d hegam mo ab s-wohog elid g Jiosh chehanig ch ab s-wohochud hegai wohokam mat am i ha tashogi g Jesus.

Am atki hahawa haꞌichu si geꞌe e chehgi an dahm kahchim ch ed. Am aniki neid mat g uwi am hema i wuhsh. Kuki g ipudaj hab mahs mo g tash. Ihda uwi oki an keishch g mashad ch g gihko ab wahkch e-moꞌo ab. K id ab gamai gohk huhuꞌu an dadha. Kutki wo ge madt. Tki ab i hihhi g s-koꞌok matki wo mahmadho. K hekaj am si shoshshak.

Kutki am i mahmadho g uwi. Tsh g madaj am d wo kownalk wehs ha dahm g jejewed. Mtki am ha hekaj bei g ali k gam hu i bei Jiosh wui. K heg an da kownal daikud ed. Tki hegai uwi gam hu heb hu meh am tohono jewed ch ed. Am atki i apch g Jiosh wehhejed mat am wo e nuhkud hemako mihl gohk siant chuhdpo wehst-mahm (1260) tash.

Am atki hahawa haꞌichu ep i e chehgi dahm kahchim ch ed. Niki am neid matki am hema i wuhshani k e wepogid g geꞌe nehbig hujud ch ge s-wegi ch ge wewaꞌak mohmi ch wehst-mahm aꞌag. K g gigiko an hab chuhchuꞌig wehs ha ab g mohmij. Kutki g e-baikaj i ha chewaim g hemako tahpani mo waik e tahpanch g huhuꞌu k im hu hab i ha juh ab dahm kahchim amjed ch am ha nehnich jewed dahm. Kutki wo mahmadho hegai uwi. T ihda Nehbig Hujud e wepogiddam am wui i kekiwua mat wo huh g madaj mat wabsh wo chum mahsi.

Kumtki ab aꞌanch g uwi g baꞌag aꞌankaj mat gam hu wo daꞌa k gan hu wo e ehstokch tohono jewed ch ed. Kumtki am wo nuhkudad waik eda hugkam aꞌahidag mat g Nehbig Hujud pi wo mua. Tki g Nehbig Hujud ab haha wabsh i iawua g shuhdagi e-chini amjed am oidk hegai uwi mat gam hu wo i chum moht. Tki wabshaba g jewed ab i wehmt g uwi, heg wa wepo mat ab i kuhpiꞌo g e-chini k im hu bah hegai shuhdagi mo ab daꞌiwuni Nehbig Hujud chini amjed.