Popular Bible Verses from COLOSSIANS 2

Share

Ab amt i e dagito Jesus Christ wui mat d wo em-kownaligk. K d hahawa em-wuikam mamt ab wo wechok ch am wo himad g e-doakag ch wehmaj d wo hemakok. An g behꞌi g e-gewkdag ab amjed mamt heg amjed baꞌich i s-gewkam ab wo wohochudad mam has i masma mashchamas ch chum hekid ab wo i mahkchid g e-hoꞌigeꞌidadag.

S-e g wo nenꞌoidk mat pi hedai wo em-iattogi. Haꞌi ash chum s-em-mashchamamk hegai mo haschu d wabsh oꞌodham ha-mahchig ch em-ahgid mamt heg ab s-ap wo himad g e-doakag. Tt wabshaba ab wo beihid g t-mashchamadag ab amjed g Christ

Neh, ahpim mam d gawul mahs hemajkam ch pi edgid g t-chehanig am wa si gawulkdas ab Jiosh t amjed heg hekaj pi ap e-chuꞌijig. T wabshaba g Jiosh ab em-wui mahtchul g e-alidag. Kumt ab i s-wohochud k hab bei g wechij doakag. Jiosh alidag at ab nako g s-koꞌok t-namkidadag kots t ab k gm hu hab i juh g pi ap t-chuꞌijig.

no pi heg d Jiosh am wehmaj g e-ohg, chum as hi wa hab masma ia jiwia mo g hemajkam. Kumt am i e hemakoj g Christ wehm k wehmaj d hekiakam. K heg ab em-mahkch g wechij doakag ch d kownal am wehs ha dahm g kokownal am jewed dahm ch an dahm kahchim ch ed.

Jiosh ash wa hab masma ha chehani g Tutuligo mat am wa has mahs haꞌichu hugi wo koꞌad ch am hab wo junihid g mihshmda piast. Idam chehanig o am chum t-tashogidahim mat has wo masmak g Jiosh si Kehsha mat hekid wo jiwia. T wabshaba ia hahawa jiwia g Jiosh si Kehsha k am hejel i e tashogi t-wui. K hahawa pi hab mahs machs am hab wo junihid hegai hab mahs haꞌichu k ch hekaj wo chum s-mahchk g Jiosh si Kehsha.