Popular Bible Verses from EVESAS 4

Share

Vae tulu vaivai karea maikamu, tulu vai tabetabekikamu muleki kina domi karea. Tulu domidomi koro lakwakamu vatavatahakikamu hokinia i God mo domidomi koro lakwakamu hinea tulu hariki lui Kraes.

Tigwaravu lo kinau savia tulu ne hivokikamu, tulu ne mulemai kina tangaloi magemu, tulu ne lagwalagwa maikamu, vae a domimiu ne bua, tulu ne hatu lologutekikamu muleki.

Tulu mo kwahakwaha tulu hatu viti a leo rau hati hinea rau magaraki na tangaloi. Tulu viti a leo karea rana hago mana tangaloi rau keokeo rana huira. A leo hokinia hi rana taritarisa lo vitivitiki, vae rana hago mana tangaloi hinea rau rongora.

Tulu tau letiuki na kinau hinea rau vai na domimiu ramo kao kinira. Tulu hatu lologute heheri, vake tulu hatu kwiribibi na lologute lolo domimiu. Tulu hatu viroro, tulu mo kwaha karakara, vake tulu hatu kwaha bulabula. Tulu hatu bebemiu kikamu.

Vake a Uliuli Kokona u viti kwara, “Diko tulu lologute tulu hatu tiraki na nomiu lologute mo turukikamu tilo hatiana.” Vae tulu hatu lologute a mataniaho mo soro maia. Tulu hatu bete a mahao lakwai Setano*.

Vae tulu tau letiuki na bohiana na nomiu tokaana tuai hinea mo toko vaikamu tulu mo huri na nomiu domidomi kehekeheki. A bohiana tuai hi mo toko vaikamu tulu mo lengai na kinau a sinasina luga, hinea vae rana magarakikamu vohoki. A domimiu mana domidomimiu, vae rana karagwa vunuhia. Tulu lugwaki na bohiana na tokaana karagwa hoki na lugwamiu hinea rau karagwa. A tokaana hi i God u taua u taritarisa mana nona tokaana, u bakoto u kokona, huri u vanamai tina vitikareaki kehekeheki.

A Tanungwe Kokona u bulutakikamu tulu mo bulu katukwale, mo betekamu kina magemuana. Tulu huirataki kwara tulu ne kwiribibi na magemuana hi ne eno maikamu kwara tulu ne bulubulu katukwale tigwaravu.

Aia hini u bete na hilehile maira lakwa na tangaloi. Tuaki u mataira rau kwareki a kaihora* kokona, tuaki rau kwareki a tangaloi* duruduruki, tuaki rau kwareki a tangaloi na kwalahaki Roro Karea, vunu tuaki rau kwareki a kaitagahuri mana tangaloi huhui lo kwarelua*. I Kraes mo vai kwehi kwara a nona tangaloi vano hi rana vai na tangaloi noi God savia rana rarai, rana vai na nona bolokiana, kwara aira vunu hi hinea rau kwareki a tarabehi i Kraes rana huira vakevake. Lo halaki hokinia hi i kita vunu tana bulu katukwale lo noda hauhuriana lo natu i God, tana kikilaia ne karea. Vae hokinia tana mulemai hoki na tangaloi hinea rau ngwarasea madi, a domidomiga u sea. Tana mulemai hoki Kraes vohoki hinea u ngwarasea u taritarisa.

Vae hokinia hi, tanahe hoki na sakwarigi te taliku. A tangaloi kurakura hinea rau tuku sinasina na tangaloi ramo turukinira lo hala hati ramo vaira a gwatuga mo hati, vae a noga huhuiana ranahe sina lavikita tea kwara tana kilu. Tanahe hoki na aga tea hinea a navo mo toko kwaeki lalikinia, vake a langi mo toko kwali lalikinia. Vae tana kwaha lo vitikareaki, tana kwahakwaha lo lagwaana. Vunu lo bohianada savia tana ngwarasea hake, vae tana mulemai hoki na tangaloi hinea a domidomiga u sea, tana hariki lui Kraes. I kita hoki na duvi na tarabehi rusa na tarabehina hinea aia kehekeheki a gwatuki na tarabehi hi, vae aia u vaikita tamo hariki tabulutaki kwara tana mulemai kina tarabehi katukwale vohoki. Vunu a hokehoke na tarabehi hi rau kwiribibi na tarabehi hi kwara ne huira tigwaravu. Vunu lolona i kita hinea a duvi na tarabehi rusa na tarabehina hi, tamo boloki lo hala hinea u taritarisa, a tarabehi hi u mauri lai. Vake lolona tamo toka lo lagwaana, a tarabehi i Kraes hi u huira vakevake.