Popular Bible Verses from Ịrẹyị Ọzwọzịsa 2

Share

Ọza ana ayị Ohomorihi oo hine tù ọọ̄ sị ịrẹyọyẹ ọnịrị ayohinee yị, dị ọ mẹ ka ọ̀ yẹ ịsa nị, ama ọza odivi vị ọnị Ohomorihii mẹ ka ọọ kụ oguu gụ, dị ọ̀ va hụrẹ wa ụvọ yị ọza ene zee ọnị eyi. Ọsọnị bẹẹ rẹ vị osusu, vị ọza aa dụ ahị kẹnẹ nị.

Sị ọza kụkụ vaa mẹ huni ka ọọ rị, dị òo hú, di òo hine ẹngụ anị ịnị ẹhẹ, dịị ịsị ọza aa mẹ, ọ̀ mẹẹ hine ẹngụ anị ẹtẹẹtẹrẹ. Dị ọnị re ve ree ka Ohomorihi kẹnẹ ọọ mẹ ọsọnị yị ọza nị; ka ẹ̀ yị vị Ohomorihi, ene zụ re ịsa rị avị ene zụ hine ẹngụ anị ayị?

Ama ọnị o ve re avaba ịsị ọnị sị ẹhị ẹngụ anị mẹ ka avaba anị vị osusu. Ọ́ sị mẹẹ anka ọza oo rere aa dụ ahị avọọ nị. Ẹ yị nyị ịsị ọza aa dụ ịnị ẹhẹ ọnọnị ana nyị ọgụ vụrụ-vụrụ.

Ọ kà ọnị ẹ yị zụ mẹ ka ịsị eyi anị oo re kẹnẹ ọnị ẹ yị nyị ọ. Ẹ yị nyị ụmẹ ọnị ọnị sị yii ka ọnị ẹ ị mẹ ẹngwọmẹ ọnyọọnyị. Avaba ụkọrọ ọnị ọnị raa mẹ vana nyayịnẹ hine ọnị. Ọsọnị ọ vị ọgụ ọnị ọnị rị ịnị avaba ụkọrọ ọnị ọnị sị ẹhị ẹngụ anị mẹ nị.

Ọnị ô re ka anka ẹtohweyi me zoza huni etohozi, avọọ ịrẹyọyẹ me zoza huni ututu ọyị mẹ nị.

Ọyẹrẹyịị re ịzị aa nọ ama onututu ẹ yị nyẹngụ re ịzị aa nọ. Ọzwọzịsa ka ọnị ọọ yẹ ka ịsị e tu ọyẹrẹyị o re vee tu onututu nị.

Ọza ọ zụ sị ịrẹyọyẹ ọnịrị ọbọ mẹ avaba ụkọrọ anị, dị ọ vị vaa para avaba ịsị ọ nyị hu. Dị ahịka ọza ẹnẹẹ yị yẹ ọ mẹmẹ wa ọ vaa sịị mẹ ẹhẹ nị. Ọsọnị ọnị rẹ vị osusu, dị ọ rẹ vị ịrẹyị odivi ọbanyị ọnya nị.