Popular Bible Verses from Luùm 4

Share

Wo Eɓulɔhɛɛ̀ŋ gò wa fè è hààweiŋ nɛ̀ jɛwɛ, yèè wo gò wa sikà wèè wo hààwè è yèɛ wo Dayà naŋ wa jɔ̀ɔ̀ ɗààhiì kɛ̀ wò do nàŋ nyɛ̀nɛ̀ŋ lɛ. E hààweuŋ nɛ̀ nauŋ wa kìɛ̀ŋ gààŋ, yèè wò naŋ tɛ̀nɛ̀ŋ wo Dayà e jòòwo gbee sùà. Wo Eɓulɔhɛɛ̀ŋ kuwa wa e hààwe sɛmɛ kɛ̀ wo Dayà do nàŋ nyɛ̀nɛ̀ŋ e yèɛ wò naŋ jɔ̀ɔ̀ ɗààhiì wèè wo nyɛ̀nɛ̀ŋ lɛ.

Wɔŋ fɛ̀ì Dayàa naŋ woò wààŋ, wo Dayà naŋ nyɛ̀nɛ̀ŋ wo Eɓulɔhɛɛ̀ŋ wo nèwàènèwe wèè anyuùŋ zimgbe maŋ fuɔŋ màŋ sùà. Wo Dayà naŋ wa jɔ̀ɔ̀ e ɗààhiì lɛɛ̀ koɓɛ̀ Eɓulɔhɛɛ̀iŋ esàɓù e hààweɛ̀ wò kuwa wo Dayà sùà lɛ, wo yèɔ naŋ gè anyuùŋ fàa nyàŋ dìì wo nyiŋ kìɛ̀ŋ wɔŋ nyiiŋ gèe, yèè wò naŋ bànè manɛ̀ŋ maŋ yè maŋ fè wa màŋ.

Wèè esàɓù maŋ jùumù wi màŋ, wo Dayà naŋ wa kìɛ̀ŋ wo Jisɛ̀ koɓɛ̀ anyuùŋ naanààŋ wèè auŋ jìwà, yèè wò nauŋ gè e fàaà dìì wɔŋ nyiiŋ gèeo sùà, wèè e nyɛ̀nɛ̀ŋ wo Dayà wo wi jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ.

Wo Eɓulɔhɛɛ̀ŋ kuwa e hààwe yèè ke jii tùlia, sèè pɛɛ wò go wa kɛ̀ɛ̀nɛ̀ŋ esaɓù bà wèè wo niŋ tùlìà jii, wo Eɓulɔhɛɛ̀ŋ kuwa wa nɔŋ e hààwe wo Dayà sùà yèè wò naŋ nɔ̀ŋ wo nèwàènèwè anyùùŋ maŋ fuɔŋ zimgbe. Wɔŋ fɛ̀ì Dayàa naŋ woò wààŋ, “Ke kpoo mɔɛ̀ŋ do nàŋ gàŋ mààŋ maŋ ɗu màŋ.”

Weètii esàɓù e hààweɛ̀ è kùwàìŋ wo Dayà sùà lɛ, è doiŋ nàŋ yɛ̀mɛ̀ e nɛ̀ɛŋ wò naŋ jɔ̀ɔ̀ ɗààhiì wèè wo wi kiɛ̀ŋ lɛ. Wèè esaɓù lɛɛ̀, wo naŋ jɔ̀ɔ̀ ɗààhiì wèè wo niŋ kìɛ̀ŋ ke kpòò Eɓulɔhɛɛ̀ŋ gbiŋ wèè foo, e ɗààhiì lɛɛ̀ fè nɔŋ wèè ànyùùŋ nyaŋ jɔɔlɔ̀ màŋ Sàwà Dayà maŋ dìì nyaŋ, kɛɛ è yaà wèè anyùùŋ nyaŋ pɛɛ kuwa hààwe màànààŋ wo Eɓulɔhɛɛ̀ŋ kuwa wa lɛ̀. Wo Eɓulɔhɛɛ̀ŋ naŋ yaà wo dèdà anyùùŋ nyaŋ gbiŋ.

“E zɔlɔ̀ yaà anyùùŋ nyaŋ wo Dayà naŋ jùùyè hakɛ̀ wèè maŋ kpèè naanààŋ nyiŋ màŋ, yèè aŋ yè nyaŋ wò naŋ jùùyè hakɛ̀ wèè maŋ jùumù nyiŋ màŋ nyaŋ! E zɔlɔ̀ yaà wo nyùnɔ̀ɔŋ wò yèɔ wo Dayà naàŋ jàà màŋ jùumùuŋ màŋ jii gbiŋ wɔ̀!”

Jàaìŋ jii kɛ̀, wɔŋ fɛ̀ì Dayàa naŋ woò wààŋ, “Wo Eɓulɔhɛɛ̀ŋ naŋ wa hààwè Dayà, yèè wèè esaɓù lii wo Dayà nauŋ wa jàà kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ.”