Popular Bible Verses from Titus 3

Share

But wen God awa Savior show us di kindness and love wey E get for us, E kon save us. Nor bi bikos wi do good, but na bikos of en mesi. E forgive awa sins and E make us new shidren kon give us new life thru di Holy Spirit. God give us dis Spirit for free thru Jesus Christ wey bi awa Savior. Since Christ grace don make us klean for God eye, wi don bi pipol wey dey wait for di life wey nor go end and wi dey sure sey, wi go get am.

Make yu remind di bilivers sey, make dem respet doz wey dey rule dem. Dem must obey and dey ready to do good. Make dem nor ever tok bad about anybody, instead make dem dey live for peace, dey gentol and dey bihave well to evribody.

Nor put mout for word wey nor dey good: like matter wey koncern who born who and kworel or fight about Jew pipol law. All dis tin dey yuzles and dem nor mean anytin.

If anybody dey won kause kworel for di church and yu don warn am rish two times and e nor gri shange, den make yu drive am.