Popular Bible Verses from John 5

Share

Kitáyoohtsiʼpoaawa kitáwanistohpoaawa. Ki ánnihkayii kitákohkottomaiʼtoawaawa annaahka nitsítapipoʼtookahka ánnom. Kii ikkamómaiʼtoainoainiki ki tákohkokkoaawa áíssksipaitapiʼssini. Ikkamáómaiʼtakiinoainiki kimátakohtokakihtsimattspoaawa kitokáʼpanisttsissoaawaistsi. Kitáksskomatapáaatoʼpoaawa anniihka manipáítapiʼssinihka. Kimátakónoaiʼtaʼpiʼnihpoaawa.

Omíi Jesus osótaminooka otsítsisttohkaisstsissi. Osótamssksinookayi okáísamanistaissi. Otsítanikkayi, “Kikátaiʼsstááhpa kááhkohkoisokaʼpssii?”

Kíniitaʼpiyikokakiópaatoohpoaawa omiistsi natóísínaakssiistsi. Kanistsíksimsstaahpoaawa kitákohtohkooʼtsiihpoaawa áíssksipaitapiiʼssini. Amíístsi natóisínaakssistsi iihtáókamoʼtsiʼpoyiiyaa niistóyi. Ki kimíssksawaisstaahpoaawa kááhkomaiʼtookssoaawayi kááhkohtohkotohsoayi amoohka manipáítapiiʼssinihka, amoohkkitáyiikaʼkimatoohpoayihka.

Omáa Jesus sotámanistsiiwayi, “Stámiipoaoot. Stámoʼtsita kisííʼkaani. Kii stámiipoomatapoot.” Ki omáa nínaawa itsíkkamsokaʼpssiwa. Sotámoʼtsima osíʼkaani. Sotámiipoomatapoowa. Óóki. Issikópiiksistsikowa annihka ksiistsikóyihka.

Ki ánnihkayii Jesus iihtanístsiiwaiksi anniihka ómohtaniihpihka “Nínna mátáónoaiksistaʼpoʼtaki ki ánnihkayii ninóóhkattohtaʼpaoʼtaki ímakssikopiiksistsikosi.” Áánistsiiwaiksi, “Nitohkoyimíyissi Áʼpistotookiwa nómohtanistaʼpaissi ostóyi manistáʼpaisspi. Nimátawawattanisttotsiiʼpaatsi niistówa. Ostóyi táwaistamáatsooka manistáʼpaisspi niʼtóí nááhkoohkattanistaʼpaissi. Ki nitsítawanisttotsiiʼpi nanistáwaistamattsíyihpi.