Popular Bible Verses from WULANG BEBASAN 2

Share

Awitdene Sang Yehuwah kang paring kawicaksanan, saka ing lesane miyos kawruh lan kapinteran.

He anakku, manawa kowe nampani tembung-tembungku, lan nyimpen prentahku ana ing sajroning atimu, temah kupingmu nggatekake marang kawicaksanan, sarta atimu kokadhepake marang kapinteran, lan manawa kowe njaluk tulung marang pangreten, lan ngenerake swaramu marang kapinteran, manawa iku kokupaya kaya golek salaka, lan pangoyakmu kaya mburu rajabrana kapendhem, kowe tumuli bakal nemu pangreten bab wedi-asih marang Pangeran Yehuwah lan oleh kawruh bab Gusti Allah.

Panjenengane nyawisi pitulungan marang wong kang jujur, – Panjenengane iku dadi tetamenge para wong kang lakune tanpa cacad – kambi njagi lakuning kaadilan, lan ngreksa lakune para kagungane yaiku wong kang padha setya.

Marga wong jujur kang bakal padha ngenggoni tanah, lan para wong kang tanpa cacad bakal padha tetep manggon ing kono, nanging para wong duraka bakal padha kasirnakake saka ing tanah iku, sarta wong kang laku cidra bakal padha kabuwang saka ing kono.

karomaneh supaya kowe uwal saka wanita tuna-susila, lan wong wadon liyane kang lunyu tembung-tembunge, kang ninggal bojone jaka-lara, sarta lali marang prasetyane Gusti Allah